Россия АҚШга ён бермоқчи эмас (+видео)
РФ Қўшма Штатлар билан музокарада иқтисодий таклифларни кўриб чиқишга тайёр, аммо сиёсий томондан ён бермоқчи эмас. Бу ҳақда Россия ташқи ишлар вазири Сергей Лавров маълум қилди.
Унинг айтишича, Москва Стив Уиткофф ва Жаред Кушнер олиб келган таклифларни кўриб чиқади, бироқ ҳеч қандай иқтисодий манфаат эвазига сиёсий позициясини ўзгартирмайди.
Яқинда Оқ уй раҳбарининг махсус элчиси Уиткофф РФ етакчиси Владимир Путин билан учрашиш учун Санкт-Петербургга келди. Бундан аввал у Ослода Украина президенти Владимир Зеленский билан музокара ўтказган эди. Учрашувда низони тугатиш ва Украина хавфсизлигини таъминлаш масалалари муҳокама қилинди.
Лавров Россия ва АҚШ муносабати тез орада тубдан ўзгаришига умид қилмаслик кераклигини таъкидламоқда. Унинг фикрича, Москва бошқа давлатларнинг қўллаб-қувватлашига таянмасдан, ўз кучига ишониши лозим.
Кремль вакили Дмитрий Песков Россияга энергетика объектларига зарбаларни вақтинча тўхтатиш эмас, балки узоқ муддатли тинчлик кераклигини билдирди. Шу билан бирга у Украина иштирокисиз можарони тўлиқ ҳал қилиб бўлмаслигини ҳам тан олди.
АҚШ президенти Дональд Трамп Украина раҳбарини РФ билан келишувга эришишга чақирди. Унинг фикрича, зиддият давом этса, вазият янада оғирлашиши мумкин. Зеленский эса Украина келажагига оид ҳар қандай музокарада мамлакат вакиллари иштирок этиши шартлигини қайд этди. Шунингдек, у Европа давлатлари томонидан пули тўланган ҳаво мудофааси ракеталарини етказиб бериш кечикаётганидан норозилик билдирди.
Трамп келаси ой Хитойда Путин ва Хитой раҳбари Си Цзиньпин билан ядровий қуролсизланиш масаласини муҳокама қилиш ниятида эканини айтди. Украинадаги уруш масаласи ҳам учрашув кун тартибидан ўрин олиши мумкин.
Умуман, Москва иқтисодий ҳамкорлик бўйича таклифларни муҳокама қилишга тайёрлигини билдирмоқда, бироқ сиёсий позициясини ўзгартириш нияти йўқ. Украина эса ўз келажагига оид қарор қабул қилинадиган музокарада бевосита иштирок этиш ниятида.
Кенжа Бекжонов,
Салимжон Обиджонов (видео),
ЎзА
