"Ўзбекнефтгаз" экспорти ўн ойда режадан 46,4 фоизга ошди (+видео)
Давлат компанияси четга 803,7 миллион долларлик маҳсулот сотди, бу режадан қарийб 255 миллион доллар кўп. Ўзбекистон давлат бюджетига 7,9 триллион сўм тўланди.
Ўзбекистоннинг давлат нефт-газ компанияси ахборот хизмати маълумотларига кўра, 2026 йил январь–октябрь ойларида " Ўзбекнефтгаз АЖ 803,7 миллион долларлик маҳсулот экспорт қилди, экспорт режаси 146,4 фоизга бажарилди. Бу рақамлардан келиб чиқадики, январь–октябрь учун экспорт режаси қарийб 549 миллион доллар бўлган, яъни компания уни тахминан 255 миллион долларга ошириб бажарган.
Товар маҳсулотларини ишлаб чиқариш режаси 103,7 фоизга бажарилди, ўсиш суръати 107,5 фоизни ташкил этди. Инвестицияларни ўзлаштириш режаси тўлиқ, ишлаб чиқаришни маҳаллийлаштириш режаси эса 129,5 фоизга бажарилди. Маҳсулот таннархи 2,1 триллион сўмга қисқартирилди.
Ўн ойда давлат бюджетига 7,9 триллион сўм тўлов амалга оширилди. Суюқ углеводородлар қазиб чиқариш ҳажми 1 миллион 16 минг тоннага етди. Автобензин, дизель ёқилғиси, суюлтирилган газ, авиакеросин, олтингугурт ва полиэтилен ишлаб чиқариш режалари ортиғи билан бажарилди. Компаниянинг ЭСГ баҳоси 50 баллдан 55 баллга кўтарилди.
Йил якунига қадар “Ўзбекнефтгаз "” 22,8 миллиард куб метр табиий газ қазиб чиқариши керак. Муборак, Шўртан, Газли ва Устюрт нефт ва газ қазиб чиқариш бошқармалари жойида ўрганилиб, 459 банддан иборат чора-тадбирлар қабул қилинди. Улар кунлик газ қазиб чиқаришни қўшимча 3,4 миллион куб метрга ошириши кўзда тутилган.
Муҳайё Турдалиева, Искандар Исматов, ЎзА
