Ўзбекистон-Хитой: кулолчилик бўйича ҳамкорлик янги босқичга чиқмоқда
Ўзбекистоннинг асрлар давомида сайқалланиб келаётган кулолчилик анъаналари бугунги кунда нафақат миллий мерос, балки халқаро маданий-иқтисодий дипломатиянинг муҳим воситасига айланиб бормоқда. Сўнгги йилларда мамлакатимизда ҳунармандчиликни қўллаб-қувватлаш ва маҳаллий маҳсулотларни дунё бозорига олиб чиқиш давлат сиёсатининг устувор йўналишларидан бири сифатида белгиланди.
«Ҳунарманд» уюшмасида кулолчилик санъатининг жаҳон тан олган маркази ҳисобланган Хитойнинг машҳур «Jingdezhen Ceramics Group» компанияси Марказий Осиё бўлими раҳбари Зҳонг Веи билан расмий учрашув бўлиб ўтди.
Мулоқот давомида икки томонлама ҳамкорликни ривожлантириш, кулолчилик ва керамика соҳасида тажриба алмашиш, қўшма лойиҳаларни амалга ошириш ҳамда ўзбек миллий кулолчилик маҳсулотларини халқаро бозорларда кенг тарғиб қилиш масалалари муҳокама қилинди.
Тадбирда қайд этилганидек, «Jingdezhen Ceramics Group» компанияси 2018 йилда ташкил этилган бўлиб, Хитойнинг Жингдезҳен шаҳрида жойлашган. Компания чинни маҳсулотларини тадқиқ қилиш, лойиҳалаш ва ишлаб чиқаришга ихтисослашган. Йиллик ишлаб чиқариш қуввати 30 миллион донадан ортиқ маиший, интерьер ва бадиий чинни маҳсулотларини ташкил этади.
Шунингдек, учрашувда Риштон кулолчилик мактабининг бой анъаналарини Хитой керамика санъати билан уйғунлаштириш, маҳаллий усталар учун янги имкониятлар яратиш ҳамда «Ипак йўли» номли қўшма керамика тўпламини яратиш истиқболлари юзасидан фикр алмашилди.
Мутахассисларнинг қайд этишича, мазкур учрашув Ўзбекистон ва Хитой ўртасида ҳунармандчилик соҳасидаги алоқаларни кенгайтириш, миллий кулолчилик санъатини халқаро миқёсда тарғиб қилиш ва янги ҳамкорлик лойиҳаларини йўлга қўйишга хизмат қилади.
Гулноза Бобоева,
ЎзА
