Мария Тимофеева Хитойдаги юришини бошлади
Хитойнинг Гуанчжоу шаҳрида теннис бўйича WTA 250 туркумига кирувчи "Guangzhou Open" турнирида Мария Тимофеева ҳамда Полина Кудерметова мамлакатимиз шарафини ҳимоя қилмоқда.
Ушбу нуфузли турнирнинг асосий тўр баҳслари биринчи даврасида Мария Тимофеева сербиялик Теодора Костович устидан 6:4, 6:1 ҳисобида зафар қучди. Энди Мария иккинчи босқичда Сунь Синьжань (Хитой) — Мананчайя Савангкэу (Таиланд) учрашуви ғолибига қарши кортга чиқади.
Иккинчи теннисчимиз Полина Кудерметова эса индонезиялик Жанис Тьен билан илк босқичда ўзаро ўйин ўтказади.
Дарвоқе, Мария ва Полина "Guangzhou Open" турнирининг жуфтлик беллашувларида биргаликда қатнашмоқда. Улар биринчи даврада аргентиналик Николь Фосса Уэрго ва нейтрал теннисчи Елена Приданкина тандеми билан куч синашади.
Маълумот учун, "Guangzhou Open" мусобақасининг умумий мукофот жамғармаси 283 минг 347 АҚШ долларини ташкил этади. Яккалик баҳслари ғолиби 37 минг 390 доллар мукофот пули ва WTA рейтинги учун 250 очкога эга бўлади.
Финал баҳсида мағлуб бўлган теннисчи 22 миннг 125 АҚШ доллар ва 163 рейтинг очкосини қўлга киритади. Ярим финал иштирокчилари 12 минг 331, чорак финалга чиққан теннисчилар эса 7 минг 25, биринчи босқичда мусобақани тарк этган иштирокчиларга 3 минг 65, иккинчи босқичда мағлуб бўлган теннисчиларга эса 4 минг 285 АҚШ долларидан пул мукофоти берилади.
Жавоҳир Тошхўжаев,
ЎзА
