Маҳoрат, тезлик ва аниқлик баҳси
Наманган шаҳрида корд авиамодель спорти бўйича Ўзбекистон кубогининг финал босқичи бўлиб ўтди. Унда мезбон жамоа билан бир қаторда Андижон, Фарғона, Бухоро, Самарқанд, Навоий ва Тошкент вилоятлари ҳамда Тошкент шаҳридан келган, жами 85 нафар спортчи ғолиблик учун ўзаро куч синашди.
Ўзбекистон Республикаси мудофаасига кўмаклашувчи «Ватанпарвар» ташкилоти ташкил этилганининг 35 йиллиги муносабати билан ўтказилган мазкур мусобақа спортнинг техник ва амалий турларини ривожлантириш, ёшларнинг ушбу йўналишга бўлган қизиқишини ошириш ҳамда иқтидорли спортчиларни қўллаб-қувватлашга қаратилди.
Уч кун давом этган баҳсларда иштирокчилар кордли авиамоделларнинг бешта йўналиши — фигурали учиш, ҳаво жанги, тезлик моделлари, ҳаво пойгаси ва нусха моделлари бўйича ўз маҳоратларини намойиш этди.
Беллашувлар давомида спортчиларнинг техник тайёргарлиги, авиамоделларни бошқариш маҳорати, аниқлик ва тезкорлиги синовдан ўтди. Ҳар бир йўналишда иштирокчилар юқори натижаларни қайд этиш ва ғолибликни қўлга киритиш учун бор имкониятларини ишга солди.
Якуний натижаларга кўра, умумжамоа ҳисобида Тошкент вилояти вакиллари биринчи ўринни эгаллаб, Ўзбекистон кубоги соҳиби бўлди. Иккинчи ўрин Тошкент шаҳри жамоасига, учинчи ўрин эса Фарғона вилояти спортчиларига насиб этди.
[gallery-32175]
Мусобақа якунида ғолиб ва совриндорлар дипломлар билан тақдирланди. Умумжамоа ҳисобида биринчи ўринни қўлга киритган Тошкент вилояти жамоасига Ўзбекистон кубоги тантанали равишда топширилди.
Ҳотам МАМАДАЛИЕВ (сурат), ЎзА
