Ватан таянчи — эртанги кун ишончи
Ватанга муҳаббат — қалбдаги энг улуғ туйғу, юрт тақдирига дахлдорлик эса ҳар бир фуқаронинг маънавий бурчидир. Бу туйғулар ёш авлод қалбида қанчалик эрта шаклланса, унинг келажакдаги ҳаёт йўли, фуқаролик позицияси ва жамият олдидаги масъулияти шунчалик мустаҳкам бўлади. Зеро, Ватанни севиш фақат унинг гўзаллигидан фахрланиш эмас, балки унинг тинчлиги, осойишталиги ва тараққиёти учун масъулиятни ҳис этиш, зарур пайтда юрт манфаатларини ҳимоя қилишга тайёр туришдир.
Бугун мамлакатимизда ёшларни ватанпарварлик, миллий қадриятларга ҳурмат, мардлик ва фидойилик руҳида тарбиялашга алоҳида эътибор қаратилаётгани бежиз эмас. Президент Шавкат Мирзиёев ташаббуси билан ёшларни ҳар томонлама қўллаб-қувватлаш, уларнинг маънавий дунёқарашини бойитиш, жисмоний ва интеллектуал салоҳиятини ривожлантириш, Ватан тақдирига дахлдорлик туйғусини кучайтиришга қаратилган ишлар изчил давом этмоқда. Бу жараёнда ҳарбий-ватанпарварлик тарбияси ёшларнинг нафақат бугунги камолоти, балки эртанги кунга тайёргарлигида ҳам муҳим аҳамият касб этади. Ана шундай эзгу мақсадлар йўлида Бухоро шаҳридаги умумтаълим мактабларининг 10–11-синф ўқувчилари иштирокида “Ватан таянчи” болалар ва ўсмирлар ҳарбий-ватанпарварлик ҳаракати отряди аъзолик гувоҳномалари ва эмблемаларини топшириш маросими ташкил этилди.
Шаҳарда жойлашган ҳарбий қисмда ўтказилган тадбир вилоят Мудофаа ишлари бошқармаси, ҳарбий прокуратура ҳамда Ўзбекистон ёшлар иттифоқи Бухоро вилояти Кенгаши ҳамкорлигида ташкил этилди. Унда фахрийлар ва жамоатчилик кенгаши аъзолари ҳам иштирок этишиб, ёш авлодни Ватанга садоқат руҳида тарбиялаш, уларнинг қалбида миллий ғурур ва юксак масъулият туйғуларини мустаҳкамлаш масалаларига эътибор қаратилди.
Тантанали маросимнинг аҳамияти фақат ўқувчиларга аъзолик гувоҳномаси ва эмблемалар топширилгани билан чекланмайди. Унинг замирида ёшларга билдирилган ишонч, улар зиммасига юкланаётган масъулият ва келажакка қаратилган эзгу мақсадлар мужассам.
Чунки гувоҳнома — шунчаки ҳужжат, эмблема эса оддий белги эмас. Улар ёшлар учун Ватан олдидаги бурчни англаш, ўз хатти-ҳаракатларига масъулият билан ёндашиш, интизомли бўлиш ва тенгдошларига намуна кўрсатишга ундайдиган маънавий рамз сифатида аҳамият касб этади.
Ҳар қандай жамиятнинг эртанги тараққиёти бугун қандай авлод вояга етаётганига боғлиқ. Билимли, ташаббускор ва мустақил фикрлайдиган ёшлар билан бирга, юртига садоқатли, бурчини теран англайдиган, қийинчиликлар олдида матонат кўрсата оладиган авлодни тарбиялаш ҳам муҳим вазифадир.
Бу борада давлат идоралари, таълим муассасалари, маҳалла, ота-оналар ва кенг жамоатчиликнинг ҳамкорлиги алоҳида ўрин тутади. Зеро, ватанпарварлик тарбияси бир кунлик тадбир ёки муайян сана билан чекланмайди. У оиладаги тарбиядан бошланиб, мактабдаги таълим, жамоатчилик муҳити ва ҳаётий тажриба орқали мустаҳкамланиб боради.
Шунинг учун ҳам ҳаракат аъзоларининг кейинги фаолиятини мазмунли ташкил этиш, уларни маърифий учрашувлар, спорт мусобақалари, ҳарбий-амалий машғулотлар, тарихий қадамжоларга саёҳатлар ва ижтимоий лойиҳаларга жалб этиш муҳимдир. Бундай ишлар ёшларнинг назарий билимларини ҳаётий кўникмалар билан бойитиб, уларда ташаббускорлик ва жамоа билан ишлаш қобилиятини ривожлантиради. Зеро, ҳарбий-ватанпарварлик тарбиясининг самараси тадбирдаги иштирокчилар сони ёки топширилган гувоҳномалар билангина эмас, балки ёшларнинг кундалик ҳаётида қандай ижобий ўзгаришлар юз бераётгани, уларнинг билим олишга интилиши, интизоми ва жамият ҳаётидаги фаоллиги билан ҳам белгиланади.
Тантанали маросимда аъзолик гувоҳномалари ва эмблемаларни қабул қилиб олган ўқувчилар энди ўз олдиларига янада юксак мақсадлар қўйиш, билим ва иқтидорларини ривожлантириш, тенгдошлари орасида ибрат кўрсатишга интилишлари лозим. Чунки уларга билдирилган ишончни оқлашнинг энг тўғри йўли — яхши ўқиш, одобли бўлиш, жамият ҳаётида фаол қатнашиш ва юрт равнақига муносиб ҳисса қўшишдир.
Зариф Комилов, ЎзА мухбири
