Телеграмдаги "микрокредит" фирибгари ушланди
Косонсой туманида телеграм орқали фуқароларга кам фоизли кредит таклиф қилиб, улардан олдиндан пул олганликда гумон қилинаётган шахс ушланди.
Дастлабки маълумотларга кўра, мазкур фирибгарлик оқибатида фуқароларга 250 миллион сўмдан ортиқ зарар етказилган.
Аниқланишича, гумонланувчи телеграм мессенжерида "микрокредит" номли сохта саҳифа очиб, фуқароларга қулай шартларда кредит ажратилишини ваъда қилган. Бироқ кредитни расмийлаштириш баҳонасида улардан олдиндан банк карталарига маълум миқдорда пул ўтказиш талаб этилган.
Таклифга ишонган фуқаролар маблағларни ўтказганидан сўнг кредит ололмаган. Шундан кейин эса улар билан алоқа узилган.
Мазкур ҳолат юзасидан олиб борилган тезкор-қидирув тадбирлари натижасида Наманган вилояти Ички ишлар бошқармаси Кибержиноятларга қарши курашиш бошқармаси ходимлари томонидан гумон қилинаётган шахс аниқланиб, қўлга олинган.
Ҳолат юзасидан Ўзбекистон Республикаси Жиноят кодексининг 168-моддаси 3-қисми "б" ва "в" бандлари билан жиноят иши қўзғатилган. Ҳозирда тегишли процессуал ҳаракатлар олиб борилмоқда.
Мутасаддилар фуқароларни ижтимоий тармоқлардаги шубҳали кредит таклифларига алданмасликка, кредит ажратиш учун олдиндан пул ўтказишни талаб қилувчи шахсларга ишонмасликка ҳамда шахсий банк маълумотларини бегоналарга бермасликка чақиради.
Ҳамроз Баёнов,
ЎзА
