“Telegram” нега канал ва гуруҳларни блокламоқда?
“Telegram” қоидани бузаётганларга қарши кескин кураш бошлади. Бир суткада юз минглаб канал ва гуруҳ блокланиши мессенжер тарихидаги янги даврдан дарак бермоқда.
Умуман, “Telegram” мессенжери маъмурияти шу йил бошидан қоидабузарликка қарши курашни сезиларли даражада кучайтирди. Сўнгги расмий маълумотга кўра, платформада атиги бир сутка ичида 100 000 дан кўп канал ва гуруҳ фаолияти тўхтатилган. Хусусан, 7 апрель куни муайян талабга жавоб бермайдиган 100 700 ҳамжамият ўчирилган. Бу йил давомида кузатилган энг йирик кўрсаткич. Аввалроқ, 17 март куни ҳам шунга яқин миқдорда манбалар чекланган эди.
2026 йил жами 12 миллионга яқин ресурс фаолиятига чек қўйилган. Бундай гуруҳларнинг аксари ички хавфсизлик сиёсатини бузгани қайд этилган. Жумладан, 154 798 ҳамжамият беҳаё материал тарқатгани учун, 53 939 ресурс зўравонликни тарғиб қилгани ёки террор фаолияти билан боғлиқлиги сабаб блокланган.
Айниқса, дастлабки ойларда назорат фаоллашган. Статистикага кўра, январь ойида ҳар куни ўртача 300 000 дан ортиқ, февралда эса кунига қарийб 230 000 канал ва гуруҳ ёпилган. Таққослаш учун 2025 йил давомида жами 44 миллионга яқин жамоа тақиққа учрагани, бу 2024 йилга нисбатан қарийб 2,7 баробар кўплигини келтириш кифоя. Ушбу рақамлар “Telegram” маъмурияти ноқонуний контентга қарши курашда автоматлаштирилган назорат тизимини янада кучайтирганини кўрсатади.
Ф.Яхшибоева, ЎзА
