Шавкат Мирзиёев инвестор ва тадбиркорларнинг мулки қатъий ҳимояда бўлишини таъкидлади
Президентимиз Шавкат Мирзиёев Янги Тошкент қурилишини жадаллаштириш масалалари юзасидан инвестор ва тадбиркорлар билан очиқ мулоқот қилмоқда.
Мулоқотда Президентимиз сармоядорларни “хорижлик” ва “маҳаллий” деб ажратишга муносабат билдирди.
– Капиталнинг, илғор ғоянинг ва ҳалол меҳнатнинг миллати йўқ! – деди давлатимиз раҳбари ва Ўзбекистон иқтисодиёти учун янги ғоя – “ЎЗ” фалсафасини илгари сурди.
“ЎЗ” – Ўзбекистон, Ўзгариш, Ўзлик ва Масъулият дегани. Кимки юртимизга сармоя киритиб, замонавий технология олиб келса ва одамларга иш ўрни яратса, қайси мамлакат ёки шаҳардан келганидан қатъи назар, умумий тараққиётга ҳисса қўшади.
– Кимки Янги Тошкентни ёки Ширинни биз билан бирга қурса, демак, у тўлақонли ўзимизники! – деди Президентимиз. Сармоядорларнинг мулки ва бизнеси қонун, давлат ва шахсан ўзининг қатъий ҳимоясида бўлишини қайд этди.
Шундан сўнг Президентимиз инвесторлар билан мулоқот қилди. Учрашувда билдирилган таклифлар эътиборсиз қолмаслиги, тез кунларда тегишли қарор қабул қилиниши айтилди. Мамлакатимиз етакчиси бир ойдан сўнг Янги Тошкентга яна келиб, берилган топшириқлар ижросини кўриб чиқишини таъкидлади.
Якунда давлатмиз раҳбари инвестор ва тадбиркорларни “Ўз ғоянг! Ўз сармоянг! Ўз келажагинг! Янги Ўзбекистон, Янги Тошкент – ўзимизники!” деган янги шиор атрофида бирлашишга чақирди. Янги Тошкентда мамлакатимиз учун муҳим бўлган кўплаб ўзига хос лойиҳалар амалга оширилишига ишонч билдирди.
ЎзА
