"Президент олимпиадаси": Тошкент шаҳри жамоаси етакчиликка эришмоқда
Бугун, 6 ноябрь куни “Президент олимпиадаси”нинг ўн биринчи мусобақалар кунида 5 та йўналишда ғолиб ва совриндорлар аниқланади.
Чирчиқдаги Ўзбекистон давлат жисмоний тарбия ва спорт университети спорт мажмуасида бокс, “Олимпия шаҳарчаси” спорт майдонларида пара таэквондо, пара енгил атлетика, сузиш, Республика олимпия ва паралимпия спорт турларига тайёрлаш марказида голбол мусобақаларининг финал баҳслари бўлиб ўтади.
Кеча Чирчиқда ёш боксчилар ўртасида ўтказилган ярим финал жанглари натижасига кўра, боксчи қизлар ўртасида Жиззах вилояти вакилларининг 6 нафар, Фарғона ва Самарқанд вилоятининг 3 нафар, Навоий ва Андижоннинг 2 нафар, шунингдек, Наманган, Бухоро, Тошкент ва Хоразм вилоятларининг 1 нафардан вакиллари финал йўлланмасини қўлга киритди.
Боксчи ўсмирлар ўртасидаги ярим финал жангларида эса Жиззах 4, Тошкент вилояти ва пойтахтнинг 3, Қашқадарё ва Андижоннинг 2, Сурхондарё, Самарқанд, Наманган, Фарғона, Хоразм ва Қорақалпоғистон Республикасининг 1 нафардан аъзолари “Президент олимпиадаси” олтин медаллари учун жанг ўтказиш ҳуқуқига эга чиқди.
“Президент олимпиадаси”нинг ўнинчи кунги шиддатли беллашувлари сарҳисобига кўра, Тошкент шаҳри жамоаси 24 та олтин, 18 тадан кумуш ва бронза медаллари билан умумжамоада етакчига айланиб олди.
Кейинги поғоналарни банд этган Самарқанд вилояти вакиллари ҳисобида 21 та олтин, 19 та кумуш ва 23 та бронза медали мавжуд. 3-ўриндан жой олган Хоразм вилояти жамоаси 21 та олтин, 14 та кумуш ва 23 та бронза медалига эгалик қилиб турибди.
Тўлқин Рўзиев,
ЎзА
