Ўзбекистон лалми ерларида пистазорлар барпо этилади
Ўзбекистон қишлоқ хўжалигида улкан ўзгаришлар: Президент фармони ижроси доирасида Самарқандда Эрон инвесторлари билан ҳамкорликда йирик пистазорлар барпо этилмоқда. Бу лойиҳа минтақа иқтисодиётига қандай таъсир кўрсатади?
Ўзбекистон Республикаси Президентининг "Саноат усулидаги интенсив мевали боғлар барпо этиш ва эскирган боғларни янгилашни қўллаб-қувватлаш чора-тадбирлари тўғрисида"ги Фармони ижроси доирасида, Агросаноатни ривожлантириш агентлиги директори Нурали Абдуллаев Самарқанд вилоятида бўлиб, амалга оширилаётган лойиҳалар билан танишди. Хусусан, Пахтачи туманининг "Дўнг" маҳалласида лалми яйлов ерларидан самарали фойдаланиш мақсадида амалга оширилаётган ишлар ўрганилди.
Агентлик директори туман ҳокими Қаюм Хушбоқов ҳамроҳлигида 5 минг куб метр ҳажмдаги қурилаётган ва келажакда 16 минг куб метр ҳажмда барпо этилиши режалаштирилган сув ҳавзаларини кўздан кечирди. Шунингдек, лойиҳа доирасида дастлаб 500 гектар, кейинчалик эса 1000 гектарга кенгайтириш кўзда тутилган пистазор майдони билан танишилди. Мазкур пистазорни барпо этишда Эрон Ислом Республикаси инвесторлари билан ҳамкорлик музокаралари олиб борилмоқда. Лойиҳага қизиқиш билдирган инвесторлар айни кунларда ҳудуддаги ер майдонларини ўрганиб, тупроқ таркиби ва имкониятларини аниқлаш мақсадида намуналар олишмоқда.
Лойиҳа халқаро бозорда юқори талабга эга, йирик мевали, юқори сифатли ва экспортбоп писта навларини етиштиришни мақсад қилган. Писта дарахтлари агротехник шароитларга қараб 4-6 йилда дастлабки ҳосилни бериб, тўлиқ ҳосилдорлик даврида интенсив парвариш орқали ҳар гектардан 3 тоннагача маҳсулот олиш имконини беради. Жаҳон бозорида бир килограмм писта 14-15 доллар атрофида сотилмоқда.
Шу билан бирга, Наманган вилоятида ҳам боғ майдонларидан самарали фойдаланиш бўйича ишлар жадаллашган. Агентликнинг Наманган вилояти бўлими бошлиғи Бектош Аҳмаджанов Норин ва Янгиқўрғон туманларида бўлиб, Янгиқўрғон тумани ҳокими Асадулла Нажмиддинов билан биргаликда самарасиз боғлар ўрнида барпо этилаётган замонавий интенсив боғ майдонларини кўздан кечирди.
Ўзбекистон Республикаси Президентининг тегишли фармони ижроси доирасида Агросаноатни ривожлантириш агентлиги томонидан ҳудудларда амалга оширилаётган ишлар ер ресурсларидан самарали фойдаланиш, замонавий агротехнологияларни жорий этиш ва экспортбоп, юқори ҳосилдорликка эга интенсив боғларни барпо этишга йўналтирилган тизимли ёндашувни намоён этади.
Самарқанддаги пистачилик лойиҳаси ҳамда Намангандаги боғларни янгилаш жараёнлари ушбу мақсадларга эришиш йўлидаги аниқ қадамлар бўлиб хизмат қилади.
Санжар Тошпўлатов,
ЎзА
