Номзодлар турнири: Синдоров бугун Накамура билан куч синашади

Бугун, 3 апрель куни Кипрда давом этаётган Номзодлар турнирининг 5-турида маҳоратли гроссмейстеримиз Жавоҳир Синдоров қора доналарда америкалик Ҳикару Накамура билан куч синашади.

Айтиш лозим, Накамура нафақат классик шахматда, балки рапид ва блиц форматларида ҳам дунёнинг энг кучли шахматчиларидан бири ҳисобланади.

Жавоҳир Номзодлар турнирида ўтган йилги Жаҳон кубогидаги ғалабаси орқали иштирок этаётган бўлса, АҚШ вакили рейтинг орқали йўлланмага эга чиққан шахматчи саналади.

Синдоров профессионал шахматдаги фаолияти давомида хавфли ва тажрибали рақибларидан бири Ҳикару Накамура билан рапид ва блиц йўналишларида бир неча бор тўқнаш келган.

Классик йўналишда бир марта куч синашган бўлиб, унда ҳам муроса йўли танланган.

Эслатиб ўтамиз, ортда қолган 4та тур ўйинлари натижасига кўра, Синдоров, 3,5 очко билан пешқадамлик қилаётган вазиятда Накамура 1,5 очко билан 8 нафар иштирокчи орасида 7-ўринда бормоқда.

14 та турдан иборат Номзодлар турнири мусобақалари 16 апрелга қадар давом этади.

Т.Рўзиев, ЎзА