Фермерлар учун амалий семинар бўлиб ўтди
Сайхунобод туманида пахта ва картошка экиш ишларига бағишланган кўргазмали амалий семинар ўтказилди. Ўзбекистон сув истеъмолчилари уюшмаси ҳудудидаги “Dax politex” фермер хўжалигида ташкил этилган тадбирда Ўзбекистон Республикаси Президенти маслаҳатчиси Шуҳрат Ғаниев, Ўзбекистон Фермерлар кенгаши раиси Аҳтам Ҳайитов, Сирдарё вилояти ҳокимининг ўринбосари Аброр Хидиров, туман ҳокими Комилжон Муллажанов, фермерлар ва соҳанинг етакчи мутахассислари иштирок этишди.
Жорий йилда туманда пахта учун 8 минг гектар ер майдони ажратилган бўлиб, шунинг 5 минг гектарида Хитойнинг “Шинжон” усули асосида интенсив технологиялар қўлланади. Бу технологиялар экинни оптимал муддатларда экиш, замонавий трактор ва сеялкалардан самарали фойдаланиш, сув ва ўғит ресурсларини мониторинг қилиш орқали ҳосилдорликни ошириш ва маҳсулот сифатини таъминлаш имконини беради. Илмий тадқиқотлар шуни кўрсатадики, пахта майдонларида интенсив технологияларни қўллаш ҳосилдорликни 20–30 фоизгача ошириши мумкин.
Семинарда соҳанинг етакчи мутахассислари фермерларга чигитни сифатли экиш учун оптимал агротехника қоидалари, сув ва нутриентлардан самарали фойдаланиш, экинларнинг ўсишини мониторинг қилиш ва технологияларни интеграциялаштирилган тарзда қўллаш бўйича амалий тавсиялар беришди. Бу жараёнлар илмий маълумотлар ва замонавий технологиялар асосида мўл ҳосил олишни таъминлайди.
Туман фермерлари томорқа ер майдонларида картошка экиш ишларини ҳам олиб бормоқда. Бу нафақат озиқ-овқат хавфсизлигини таъминлайди, балки маҳаллий аҳоли учун қўшимча иш ўринлари яратади, қишлоқ жойларда иқтисодий фаолликни оширади ва аҳолининг даромадини кўпайтириб беради.
Замонавий агротехнологиялар ва илмий ёндашув қўлланганда ҳосилдорлик прогнозланади, сув ва ўғит ресурсларидан оқилона фойдаланиш таъминланади, экологик таъсир минималлаштирилади ва мамлакатнинг озиқ-овқат хавфсизлиги ҳамда иқтисодий барқарорлиги мустаҳкамланади.
Ғулом Примов, ЎзА
