ЕИ Путин билан музокаралар учун махсус вакил тайинламоқчи
Европа Украинадаги низони ҳал қилиш бўйича Россия президенти Владимир Путин билан музокара олиб бориш учун махсус вакил тайинлаш имкониятини муҳокама қилмоқда. “Politico” нашрининг ёзишича, Европа етакчилари АҚШ ва РФ Европанинг иштирокисиз музокара олиб бориши ва унинг манфаатларини ҳимоясиз қолдиришидан хавотирда.
Чехия президенти Петр Павел бу вазиятда Евроиттифоққа Европа номидан гапиришга ваколатли шахс кераклигини айтди. Муҳокама қилинаётган номзодлар орасида Финляндия президенти Александр Стубб, Европа Кенгаши президенти Антониу Кошта ва бошқа лидерлар бор.
Нашрнинг ёзишича, Стубб Трамп билан яхши муносабатлари ва Финляндиянинг Россия билан муносабатлардаги тажрибаси туфайли эътиборни тортмоқда. Айни пайтда, Кошта баъзи дипломатлар томонидан янада бетараф воситачи сифатида қаралади.
С.Раҳимов, ЎзА
