Чегара масканларида фитосанитар назорат кучайтирилди (+видео)
Бугунги кунда Ўсимликлар карантини ва ҳимояси агентлиги томонидан фитосанитар хавфсизликни таъминлаш мақсадида республика ҳудудига олиб кирилаётган ўсимликлар устидан кучайтирилган карантин назоратини давом этирмоқда.
Чегара масканларида фаолияти йўлга қўйилган кинологлар ва «детектор хизмат ит»лари ёрдамида қонунбузарлик ҳолатлари аниқланиб, фитосанитар хавфи юқори бўлган маҳсулотларнинг ноқонуний импорти олди олинмоқда.
Жумладан, Тошкент вилоятидаги “Навоий” ЎКЧМ (Ўсимликлар карантини чегара маскани)да ўтказилган ана шундай карантин кўриги давомида Қозоғистон Республикасидан келган фуқаронинг қўл юкларида 1500 дона турли хил гул уруғлари ва илдизлари борлиги аниқланди. Фуқаро ушбу маҳсулотларга тегишли фитосанитар сертификат ва карантин рухсатномасини тақдим эта олмаган. Ҳолат юзасидан далолатнома расмийлаштирилиб, efito.uz ахборот тизими орқали хабарнома жўнатилди. Унга ўсимлик маҳсулотларини олиб ўтиш билан боғлиқ тартиб тушунтирилиб, юк ортга қайтарилди.
Самарқанд халқаро аэропортида эса Хитой давлатидан келган фуқаронинг қўл юки ва багажида полиз экини уруғлари аниқланди. Мазкур маҳсулот белгиланган тартибда олинди ва йўқ қилинадиган бўлди.
Шунингдек, кинологлар томонидан Россия давлатидан келган фуқаронинг юкларида 75 туп 3 хил турдаги арча кўчатлари борлиги маълум бўлди. Ушбу кўчатлар ҳам қонунчиликда белгиланган тартибга асосан йўқ қилинади.
Қайд этиш лозим, ўсимликлар ва уларнинг қисмлари, уруғлар ҳамда кўчатларни республика ҳудудига олиб киришда белгиланган фитосанитар талабларга қатъий риоя қилиниши лозим. Тегишли ҳужжатларсиз юқори фитосанитар хавфга эга маҳсулотларни олиб кириш ва олиб чиқиш қонунчиликка зид ҳисобланиб, ҳуқуқбузарларга белгиланган тартибда чоралар кўрилади.
<iframe width="640" height="420" src="https://www.youtube.com/embed/PcaL1t0UwZM" title="Chegara maskanlarida fitosanitar nazorat kuchaytirildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов, Салимжон Обиджонов (видео), ЎзА
