Беларусь ким билан урушга тайёрланяпти (+видео)
Дунёда табиий офатлар, геосиёсий кескинлик ва йирик халқаро лойиҳалар кун тартибидан тушмаяпти: Индонезияда кучли зилзила юз бериб қурбонлар қайд этилди, Туркияда мигрантлар фожиаси содир бўлди, Беларусь урушга тайёргарликни кучайтирмоқда, АҚШ Эрондаги стратегик ресурслар бўйича мураккаб режани кўриб чиқмоқда. Шу билан бирга, Эрон атрофидаги вазият янада таранглашиб, юқори даражадаги шахслар жароҳатлангани ҳақида хабарлар тарқалмоқда, NASA эса ярим асрдан кейин инсонни яна Ой атрофига юбориш арафасида. Европада эса табиий ҳодисалар, жумладан, қум бўрони Крит оролида фавқулодда вазиятга сабаб бўлди.
<iframe width="650" height="420" src="https://www.youtube.com/embed/3e2Mnnsyjf0" title="Belarus kim bilan urushga tayyorlanyapti?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Индонезияда 7,4 магнитудали кучли зилзила юз берди
Индонезиянинг Тернате шаҳри яқинидаги Шимолий Малуку денгизида 7,4 магнитудали кучли зилзила юз берди. Ер силкиниши 35 километр чуқурликда содир бўлиб, эпицентри Тернатедан тахминан 120 километр узоқликда жойлашган. Ҳодиса оқибатида камида бир киши ҳалок бўлган, цунами хавфи эълон қилиниб, аҳоли эвакуацияга тайёр туришга чақирилган. Манадо шаҳрида бино қулашидан бир киши ҳалок бўлиб, яна бири жароҳатланган, кейинчалик қайд этилган тўлқинлардан сўнг цунами хавфи бекор қилинган.
Лукашенко Беларусь урушга тайёрланаётганини айтди
Беларусь президенти Александр Лукашенко Қуролли кучларнинг комплекс текшируви якунларига бағишланган йиғилишда мамлакат урушга тайёрланаётганини маълум қилди. Унинг сўзларига кўра, зарур ҳолатда қўшинлар сони 500 минг нафаргача етказилиши мумкин. Текширув давомида ҳарбий бўлинмалар турли шароитларда синовдан ўтказилган, шунингдек, Беларусь ва Шимолий Корея ўртасида имзоланган ҳамкорлик келишуви геосиёсий вазият билан боғлиқ экани таъкидланган.
“Тарихдаги энг қийин операция”: Трамп Эрондаги ярим тонна уранни қўлга киритмоқчи
АҚШ ҳарбийлари президент Дональд Трампга Эрондаги қарийб 450 килограмм юқори бойитилган уранни қўлга киритиш бўйича режа тақдим этди. Унга кўра, ҳудудга оғир техника киритилиб, махсус учиш-қўниш йўлаги қурилиши кўзда тутилган. Мутахассислар бу операция тарихдаги энг мураккаб миссиялардан бири бўлиши мумкинлигини айтиб, уни амалга ошириш учун катта ҳарбий куч ва вақт талаб этилишини таъкидламоқда.
Можтаба Ҳуманаийнинг маслаҳатчиси оғир яраланди — ОАВ
Эрон олий раҳнамоси Можтаба Ҳуманаийнинг маслаҳатчиси Камол Харрозий Теҳронга уюштирилган авиаҳужумлардан бирида оғир яраланган. Маълумотларга кўра, у нишонга олинган бўлиб, аҳволи оғир. Расмийлар ҳозирча бу ҳақда изоҳ бермаган, айрим манбалар эса аввалги ҳужумларда Али Ҳуманаий ҳалок бўлганини ва ҳокимият алмашганини билдирмоқда.
Инсоният ярим асрдан кейин илк бор Ойга йўл олди
NASA тўрт нафар астронавтни Ой атрофида 10 кунлик парвозга юборишга тайёргарлик кўрмоқда. Artemis II миссияси доирасида парвоз Флоридадаги Кеннеди космик марказидан амалга оширилиб, экипаж 406 минг километр масофагача етади. Парвоз давомида ҳаётни таъминлаш тизимлари ва бошқарув синовдан ўтказилади, бу эса келажакда Ойда база яратиш йўлида муҳим босқич ҳисобланади.
Туркияда мигрантлар бўлган қайиқ ағдарилиб, 18 киши ҳалок бўлди
Туркия сув ҳудудида мигрантлар бўлган моторли қайиқ ағдарилиб кетиши оқибатида камида 18 киши ҳалок бўлди. Қайиқ огоҳлантиришларга қарамай қочишга уринган ва кучли тўлқинлар сабаб Бодрум яқинида ағдарилган. Қидирув-қутқарув ишлари давомида 21 нафар киши қутқарилди, ҳозирда бедарак йўқолганларни излаш ишлари давом этмоқда.
Крит оролининг осмони қизил тусга кирди
Грециянинг Крит ороли осмони Африкадан келган қум бўрони таъсирида қизил ва тўқ сариқ рангга кирди. Ёмон об-ҳаво туфайли аэропортларда кўриш даражаси пасайиб, айрим рейслар кечиктирилди. Қум бўрони орол ҳудудларига ҳам таъсир қилиб, уйлар ва йўлларда муаммолар юзага келтирган, ҳаводаги чанг миқдори эса жуда юқори даражага етган.
Нозимбек Мардонов, Салим Обиджонов ЎзА
