Австралияда ёнилғи солиғи 50 фоиз қисқартирилди

Глобал энергетика инқирози шароитида Австралия ҳукумати аҳолини қўллаб-қувватлаш мақсадида бензин ва дизель ёнилғисига қўйиладиган акциз солиғини вақтинча 50 фоиз қисқартирди. Бош вазир Энтони Альбанез маълум қилишича, ушбу чора 1 апрелдан 30 июнгача амал қилади.

Натижада бензиннинг ҳар литри тахминан 26,3 цент арзонлашади ва ҳайдовчилар сиғимни бир марта тўлдиришда 65 литр учун ўртача 13 АҚШ долларини тежайди. Шунингдек, оғир юк транспорти учун тўлов ҳам уч ойга тўхтатилади. Яқин Шарқдаги ҳарбий кескинлик сабаб ёнилғи нархи кўтарилгач, нефть бир баррель учун 116 долларга етди. Маълумки, яшил қитъа ёнилғининг 80 фоизини импорт қилади. Шу боис жаҳон бозоридаги тебраниш мамлакатга тез ва сезиларли таъсир кўрсатди: март ойида дизель ёнилғиси 10 фоиз, бензин эса 8 фоиз қимматлашди. Талвасали харид жараёнида 500 дан кўп манзилда ёнилғи тақчиллиги кузатилди. Дарвоқе, энергетика вазири Крис Бовен вазият назорат остида эканини таъкидлаб, мамлакат омборларида ҳозир 39 кунлик бензин, 30 кунлик дизель ҳамда авиация ёнилғиси захираси мавжудлигига урғу берди. Мутахассислар фикрича, солиқ имтиёзи аҳолига бироз енгиллик берса-да, ёнилғи нархи умумий ўсишини тўлиқ тўхтатолмайди. Зеро, асосий муаммо жаҳон бозоридаги хом ашё нархи билан боғлиқ.

Ф. Яхшибоева, ЎзА