Венгрия ва Туркия Швециянинг НАТОга кириши бўйича келишувни икки давлат парламентларида ратификация қилиш жараёни тўғрисида бир-бирини хабардор қилиб туришни белгилаб олдилар. Бу ҳақда Венгрия ташқи ишлар ва ташқи савдо вазири Петер Сийярто Бош вазир Виктор Орбан ва Президент Режеп Таййип Эрдоғаннинг Будапештдаги музокараси якунида маълум қилди.

“Биз доимий маслаҳатлашув аснсоида бир-биримизни Швециянинг Шимолий Атлантика альянсига киришига оид миллий парламентларда олиб борилаётган иш ва жараён ҳақида хабардор қилиб турдик”, деди вазир. Унинг сўзларига кўра, Венгрия ва Туркия бу амалиётни парламентлар ёзги таътилдан қайтганидан кейин ҳам давом эттиради. Шундан кейин Швециянинг НАТОга қабул қилиниши ҳақидаги аризани “кун тартибига қачон қўйиш масаласи” ҳал қилинади, дея баёнот берди Сийярто.

Туркия раҳбари матбуот хизмати хабар беришича, икки давлат етакчилари Анқаранинг Европа Иттифиқига тўла ҳуқуқли аъзо бўлиб кириши ҳамда бошқа халқаро мавзуларда ҳам фикр алмашган.

Эрдоған Орбан таклифига биноан, Венгрия давлат байрами – авлиё Иштван кунига бағишланган тадбирларда иштирок этиш учун Будапештга борди.

ЎзА