Мамлакатимизда хотин-қизларни қўллаб-қувватлаш тизимини янги босқичга кўтариш, аёлларнинг жамиятдаги ўрнини янада юксалтириш ва мустаҳкамлаш, шунингдек, уларнинг ижтимоий ҳимоясини кучайтириш, оилавий зўравонликнинг олдини олиш, гендер тенгликни қарор топтириш борасида қатор ишлар амалга оширилмоқда.

Хоразм вилояти Ички ишлар бошқармаси хотин-қизлар масалалари бўйича масъуллари ташаббуси билан Оила ва хотин-қизлар бошқармаси, Урганч шаҳар Оила ва хотин-қизлар бўлими ҳамда Урганч шаҳар “Ишга марҳамат” мономаркази ҳамкорлигида хотин-қизларни ижтимоий-ҳуқуқий жиҳатдан ҳимоя қилиш мақсадига қаратилган “Мен кучли аёлман” лойиҳаси илк маротаба тажриба тариқасида Урганч шаҳрида ўтказилмоқда. Ушбу лойиҳа билан яқиндан танишиш мақсадида Бош вазир ўринбосари Зулайҳо Маҳкамова Урганч шаҳаридаги “Ишга марҳамат” мономарказида бўлди.

Мазкур лойиҳа доирасида 13 нафар иштирокчи айни кунларда “Ишга марҳамат” мономарказида бир қанча касб-ҳунар сирларини ўзлаштирмоқда. Зулайҳо Маҳкамова мономарказ фаолияти билан танишиб, хотин-қизларнинг жамиятдаги фаоллигини таъминлаш, уларда ўзига ва ҳаётга бўлган ишончини ошириш, маънавий дунёқарашини юксалтириш, билим-салоҳиятини ривожлантиришдаги ўрнини эътироф этди. Шунингдек, ноёб иқтидор соҳибаларини кашф этиш, улар яшаётган оилаларда соғлом маънавий-ахлоқий муҳитни қарор топтириш, аёлларни турли кўринишдаги тазйиқ ва зўравонликлардан ҳимоя қилиш, улар ўртасида ҳуқуқбузарлик ва жиноятчилик каби салбий ҳолатларнинг юзага келишини олдини олишда бу каби лойиҳалар муҳим аҳамият касб этишини таъкидлади.

[gallery-13797]

Беҳзодбек Саидов (сурат), ЎзА