Россия-Украина
АҚШ Конгресси Вакиллар палатаси мамлакатнинг келаси йил учун мудофаа бюджети лойиҳасидан Украинага 300 миллион доллар ажратиш тўғрисидаги бандни чиқариб ташлади. Бу ҳақда “C-SPAN” телеканали маълум қилди.
АҚШ Конгресси ва мамлакат халқи Украинани қўллашдан воз кечиш ниятида эмас, деди Давлат котиби Энтони Блинкен.
“Конгрессда бу қарашга қарши чиқаётганлар бор, иккала палатадаги кўпчилик Киевни қўллаш тарафдори”, дея қўшимча қилган у.
Блинкеннинг сўзларига кўра, Украина ҳудудларидан воз кечиш ҳисобига зиддиятни ҳал этиш тўғрисидаги қарорни Киев ҳал этиши керак.
Украинанинг капитуляцияси тинчлик келтирмайди, балки мамлакат оккупациясига олиб келади. Бу ҳақда НАТО Бош котиби Йенс Столтенберг Киевда баёнот берди.
Альянс матбуот хизмати хабарида унинг сўзларидан қуйидаги иқтибос келтирилган:
- Россия бугун можарога барҳам бериши мумкин, Украинада эса бундай имконият йўқ. Украинанинг капитуляцияси тинчлик, дегани эмас, бу Россиянинг жиддий оккупациясидир.
Эрондан Россияга етказиб берилган ракеталар ҳақида маълумот йўқ, деган Столтенберг.
АҚШ Президенти Жо Байден 20 октябрь куни Вашингтонда Еврокомиссия ва Европа кенгаши раҳбарлари Урсула фон дер Ляйен ва Шарль Мишелни қабул қилади.
Томонлар келгусида Украинага ёрдам бериш, шунингдек, иқтисодиёт ва замонавий технологиялар билан боғлиқ масалаларни муҳокама қилишади, деб маълум қилди Оқ уй матбуот хизмати.
Хабарда айтилишича, Байден лавозимга келгандан кейин ўтказиладиган АҚШ - ЕИ саммитидир.
Украинага АҚШ қурол-аслаҳалари етказиб берилиши сустлашуви мамлакат федерал ҳукумати иши тўхтатилишига боғлиқ бўлади, деди мудофаа вазирининг молия масаласи бўйича ўринбосари Майкл Маккорд “Bloomberg” агентлигига. Унинг сўзларига кўра, Пентагонда Конгресснинг Киевга қўшимча беш миллиард долларлик қурол-аслаҳа, ҳарбий техника жўнатишга рухсати бор.
Қозоғистон Президенти Қосим-Жомарт Тоқаев Германия канцлери Олаф Шольц билан музокарадан сўнг, республика Украина инқирозини ҳал этишда бошқа давлатлар берган вариантларни қўллаб-қувватлайди, дея баёнот берди.
Буюк Британия Украинага ҳарбий ёрдам кўрсатишда давом этади, деди қироллик мудофаа вазири Грант Шэппс.
“Биз ўн минглаб украиналик аскарни тайёргарликдан ўтказдик, миллионлаб фунт стерлингга юз минглаб ўқ-дори етказиб бердик, ушбу мамлакатга иқтисодий ва гуманитар ёрдам кўрсатдик”, деди у.
Покистон Украина инқирозида, шунингдек Ғарб, Россия ва Хитой ўртасида кучайиб бораётган рақобатда бетараф позициясини сақлаб қолади. Бу ҳақда “The Washington Post” нашрига мамлакат муваққат ҳукумати раҳбари Анвар Ул-Ҳақ Какар айтган.
Украина ҳукумати томонидан Польшага қарши муносабат билдирилиши украиналикларга хайрихоҳлик кайфиятини сусайтиради, деди республика қишлоқ хўжалиги вазири Роберт Телус.
Ғарб давлатлари Украинага тобора камроқ маблағ ажратмоқда, Киевга ҳам молиявий ёрдам сўраш тобора оғирлашмоқда, деди вазир Сергей Марченко “Рада” телеканалига.
Украина Коррупциянинг олдини олиш миллий агентлиги Россиядаги 47 та олмос компаниясига санкция киритиш учун номзодлар рўйхатини тайёрлади. Агентлик баёнотида “Россия олмос етказиб бериш бўйича йирик давлат бўлиб қолмоқда, шунинг учун РФдаги олмосни қазиб олиш, қайта ишлаш ва сотиш компанияларининг 47 тасига нисбатан санкция жорий этиш таклифи ҳозирланмоқда”, дейилган.
Аброр ХОН, ЎзА