Ҳиндистоннинг Гоа шаҳрида акробатика бўйича ўтказилган Осиё чемпионатида мамлакатимиз спортчилари муваффақиятли иштирок этди.

Турли ёш тоифаларида ўтган чемпионатда етакчи акробатларимиз юқори ўринлар учун кураш олиб борди. Маҳоратли спортчиларимиз 4 та олтин, 5 та кумуш ва 1 та бронза, жами 10 та медални қўлга киритди.

Фахрий спортчиларимиздан Азизбек Сапарбоев, Анвар Ғофуров, Икромжон Насиров, Ҳикматулла Иброҳимов, хотин-қиз спортчиларимиздан Жасмина Неъматова, Нигина Худойназарова, Ойнур Мусурмонова, йигитлардан Суҳробжон Амруллаев, Ихлосбек Тошалиев, Азизбек Зоҳиджонов, Абдуллоҳ Ғойбуллаев жамоавий ва яккалик баҳсларда олтин медалларга эгалик қилишди.

Шунингдек, Дониёрхон Валиев ва Муҳаммадқодир Бозорбоев жуфтликда ғолиб чиққан бўлса, Умида Насивалиева, Икромжон Раимов, Иззатулло Ўринбоев, Сардорбек Асатуллоев каби спортчиларимиз совриндорлар қаторидан ўрин эгаллади.

Бугун қитъа чемпионатида юқори натижаларга эришган спорт жамоамиз Тошкентга қайтиб келди.

Т.Рўзиев,

ЎзА