Өзбекстанның Бас прокуроры ТМД және ШЫҰ аясындағы бас прокурорлар жиындарына қатысты
Өзбекстан Республикасының Бас прокуроры Ниғматилла Йулдошев бастаған делегация Қазан қаласында өткен Тәуелсіз Мемлекеттер Достастығына (ТМД) мүше мемлекеттер бас прокурорларының Үйлестіру кеңесінің 36-отырысына қатысты.
Жиында шетелге заңсыз шығарылған активтерді қайтару саласындағы қазіргі сын-қатерлер мен жаңа шешімдер бойынша тәжірибе алмасылды.
Өзбекстанның Бас прокуроры «Өзбекстан Республикасы прокуратура органдарының активтерді шетелден қайтару саласындағы тәжірибесі» тақырыбында баяндама жасады.
Отырыс қорытындысы бойынша тиісті шешімдер қабылданып, оларда ТМД-ға мүше мемлекеттердің прокуратура органдары арасындағы ынтымақтастықты одан әрі дамыту мен нығайтудың негізгі бағыттары айқындалды.
Сонымен қатар, осы жиын аясында Өзбекстан Республикасының Бас прокуроры Н. Йулдошев Ресей Федерациясының Бас прокуроры А. Гуцанмен кездесті.
Кездесуде тараптар ынтымақтастықты одан әрі нығайту, озық тәжірибе алмасу және құқық қорғау органдары арасындағы өзара іс-қимылды жетілдіру жөніндегі маңызды мәселелерді талқылады.
Ресейге сапар аясында Өзбекстан делегациясы Шанхай ынтымақтастық ұйымына (ШЫҰ) мүше мемлекеттер бас прокурорларының 24-отырысына да қатысты.
Жиында отбасылар мен кәмелетке толмағандарды қорғау, дәстүрлі отбасылық құндылықтарды нығайту, балалардың құқықтарын қамтамасыз ету, сондай-ақ әйелдер мен балаларға қатысты зорлық-зомбылыққа және басқа да заманауи қатерлерге қарсы күрес тетіктерін жетілдіру мәселелері талқыланды.
Сонымен қатар осы бағытта ШЫҰ-ға мүше мемлекеттердің прокуратура органдары арасында тәжірибе алмасылды.
Іс-шара барысында Өзбекстан Республикасының Бас прокуроры «Дәстүрлі отбасылық құндылықтарды қорғау және кәмелетке толмағандар арасында деструктивті контенттің таралуына жол бермеу» тақырыбында баяндама жасады.
Беларусь, Үндістан, Иран, Қазақстан, Қытай, Қырғызстан, Пәкістан, Ресей және Тәжікстанның прокуратура органдары басшылары да қатысқан жиынның қорытындысында бас прокурорлар ШЫҰ аясындағы ынтымақтастықты одан әрі нығайтуға деген ортақ ұмтылысты растайтын хаттамаға қол қойды.
