Ўзбекистон ва Германия давлатлари ўртасидаги ўзаро манфаатли алоқалар мустаҳкамланиб бормоқда. Жорий йилнинг 2-3 май кунлари икки мамлакат раҳбарларининг учрашуви ҳамда бу жараёнда иқтисодиёт, савдо, молия, таълим, фан ва инновация соҳаларида ҳукуматлараро ва идоралараро келишувлар ҳамкорлик йўлида муҳим қадам бўлди.
Яқинда Тошкентда Германиянинг бирлашиш куни муносабати билан ташкил этилган тантанали тадбир ҳам томонлар ўртасидаги дўстона муносабатларнинг илиқ ва ўзига хос кўринишидир.
Ушбу тадбирда Ўзбекистон Республикаси Бош вазири Абдулла Арипов, Германиянинг Ўзбекистондаги Фавқулодда ва мухтор элчиси Тило Клиннер ва Германия ташқи савдо департаменти раҳбари, доктор Фолькер Трейер иштирок этди. Шунингдек, унда маҳаллий ва хорижлик меҳмонлар, дипломатик корпус вакиллари ва элчилар ҳам қатнашди.
Германиянинг Ўзбекистондаги Фавқулодда ва мухтор элчиси Тило Клиннер ўз нутқида қайд этганидек, ушбу маросим “Германия-Ўзбекистон кун тартиби – инсонларга хизмат қилиш” шиори остида ўтказилди.
Тадбир доирасида Германиянинг Ўзбекистондаги Фавқулодда ва мухтор элчиси Тило Клиннернинг икки мамлакат ҳамкорлиги ҳақидаги фикрларига қизиқдик.
–Жаноб элчи, аввало, тиғиз пайтда бизга вақт ажратганингиз учун катта раҳмат. Дастлаб Германия бирлашиш куни тадбири ҳақида тўхталиб ўтсангиз.
–Биз Тошкентда Германия бирлашиш кунини тантанали нишонладик. Аслида, 3 октябрда биз ушбу кунни нишонлаймиз. Лекин биз бу тадбирни олдинроқ нишонлашга қарор қилдик. Бу муҳим бизнес делегациянинг шу ерда эканлиги билан боғлиқ.
Шуни алоҳида таъкидлаш керакки, ўзбек дўстларимиз билан биргаликда инновацияларни ривожлантириш, иқтисодий ва экологик муаммоларни ҳал қилиш йўлларини излаймиз. Шу билан бирга, талаба ва мутахассисларни, ёшларни Германияда ўқиш ва ишлаш учун таклиф этамиз.
Бугунги кунда бизнинг сиёсий, иқтисодий ва маданий алоқаларимиз ҳамкорлик тарихидаги энг юқори даражага кўтарилди. Бунда ўтган йилнинг муҳим ташрифларини таъкидлаш лозим. Германия федерал ташқи ишлар вазири Анналена Бербокнинг Тошкентга ташрифи, Бош вазир Абдулла Ариповнинг Берлин ва Гамбургга ташрифи, жорий йил Ўзбекистон Республикаси Президенти Шавкат Мирзиёевнинг Германияга ташрифи бу борада муҳим аҳамиятга эга бўлди.
Ўзбекистон ва Германия Президентлари биргаликда Жеймс Симон галереясига ташриф буюриб, “Ўзбекистоннинг археологик хазиналари. Македониялик Искандардан Кушонлар салтанатигача” номли ноёб кўргазмани очди.
[gallery-13634]
Шу боис, биз ушбу кеча “Германия-Ўзбекистон кун тартиби – инсонларга хизмат қилиш” шиори остида ўтказилди.
–Ўзбекистонда амалга оширилаётган ислоҳотларнинг икки давлат ҳамкорлигидаги тутган ўрнини қандай изоҳлайсиз?
–Ўзбекистон ислоҳотлар йўлидан бораётган давлат эканини кўриб турибмиз. Қандай муваффақиятларга эришилганини ҳам кўраяпмиз.
Ҳисоблаймизки, Германия бу йўлда жуда ишончли шерик бўлиши мумкин. Технология, таълим ва кўплаб соҳаларда алоқаларимиз йўлга қўйилган. Шу маънода айтиш мумкинки, Ўзбекистон билан ҳамкорлигимиз кўп қиррали.
–Сизнингча, Ўзбекистон ва Германия ўртасидаги шерикликни яна қайси соҳаларда мустаҳкамлаш мақсадга мувофиқ?
– Албатта, бу борада мен баъзи соҳаларни санаб ўтишим мумкин. Масалан, Германияда тоғ-кон саноати, сув иқтисодиёти ва тиббиёт соҳалари жуда яхши ривожланган. Фармакология, қишлоқ хўжалиги техникаси ва бошқа кўплаб соҳаларда ҳамкорликни янада кенгайтиришга ҳаракат қилмоқдамиз.
Германия жуда хилма-хил компаниялар фаолият юритадиган мамлакатдир. Бу кўплаб эҳтиёжлар ва ҳамкорликнинг амалий эҳтиёжларига аниқ жавоб беради. Яна бир жиҳат: бу ҳақда ҳозир тез-тез гапиришади – Ўзбекистонни Европа бозорлари билан боғлаш учун ўзаро ҳамкорлик логистикасидир. Чунки бу жуда муҳим.
Албатта, биз Ўзбекистон билан ишончли шерик сифатида жиддий ҳамкорлик қилмоқчимиз.
Юқорида қайд этганимдек, Бош вазир Абдулла Арипов, кейин эса Президент жаноби олийлари ва муҳим делегациялар Германияга ташриф буюрди. Бу эса ҳамкорликни ҳар томонлама мустаҳкамлашга кенг йўл очиб беради.
–Жаноб элчи, сизга Германия ва Ўзбекистон ўртасида дипломатик алоқа ва ҳамкорликка ҳисса қўшишда куч-ғайрат тилаймиз. Саволлармизга вақт ажратиб жавоб берганингиз учун ташаккур билдирамиз.
<iframe width="560" height="315" src="https://www.youtube.com/embed/WcMbtyDBK2U?si=-pysGzIWenRtqhR4" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>ЎзА мухбири
Насиба ЗИЁДУЛЛАЕВА
суҳбатлашди.