Бельгиянинг Ломмель шаҳрида таэквондо WТ бўйича поёнига етган "Belgian Open" халқаро мусобақасида мамлакатимиз спортчилари 3 та олтин, 1 та кумуш ва 2 та бронза медалини қўлга киритиб, умумжамоада 1-ўринни эгаллади.
Дунёнинг энг кучли таэквондочилари қатнашган баҳсларда ҳамюртларимиздан Улуғбек Рашитов, Шуҳрат Салаев ва Ниёз Пўлатов барча рақибларини мағлуб этиб, олтин медалларни қўлга киритган бўлса, Феруза Содиқова кумуш, Мадинабону Маннопова ҳамда Никита Рафалович бронза медалларига мушарраф бўлди.
Медаллар жамғаришда Ўзбекистон терма жамоасидан кейинги ўринларни 2 та олтин, 3 та кумуш ва 2 та бронза медали билан Хитой терма жамоаси ҳамда 2 та олтин, 1та кумуш, 3 та бронза медалига эга чиққан Хорватия вакиллари банд этишди. Шунингдек, кучли бешликдан Қозоғистон ва Испания жамоалари ҳам жой олишди.
Пекин олимпиадаси ва ёзги Осиё ўйинлари олдидан таэквондочилар учун муҳим тайёргарлик вазифасини ўтаган мазкур турнирда ҳамюртларимиз 8 нафар спортчи билан иштирок этиб, уларнинг 6 нафари совриндорлар сафидан жой олиши ҳам натижаларнинг сермаҳсул бўлганидан далолат.
Т.Рўзиев, ЎзА