Жиззахга келган Россия Федерациясининг Ўзбекистон Республикасидаги Савдо ваколатхонаси вакили Константин Злигостев раҳбарлигидаги ишбилармонлар делегация аъзоларини вилоят ҳокими Эргаш Салиев қабул қилди.

Айни пайтда Жиззах вилоятида Россия Федерацияси билан умумий қиймати 198 миллион 900 минг АҚШ долларилик 8 та инвестиция лойиҳалари амалга оширилмоқда. Ушбу инвестиция лойиҳаларининг амалга оширилиши натижасида  мингдан ортиқ янги иш ўринлари яратилиши кутилмоқда. Мазкур лойиҳалардан 3 таси йил охиригача амалга оширилиб, ҳудудда енгил автомобиллар, бўялган матолар ишлаб чиқариш ва логистика хизмати ташкил этилиши кўзда тутилган.  

Жиззахнинг Россияга қилган экспорт ҳажми жорий йилнинг январь-февраль ойлари давомида 9 миллион 400 минг АҚШ долларини ташкил этди. Шунингдек, жорий йилнинг январь-февраль ойларида Россиядан Жиззах вилоятига қилган импорт ҳажми эса 8 миллион 300 минг АҚШ долларини ташкил қилмоқда. Айни пайтда Жиззах вилоятида Россия Федерацияси корхоналари иштирокидаги 20 та қўшма корхона рўйхатдан ўтган бўлиб, шундан 8 та қўшма корхона саноат, 4 таси қишлоқ хўжалиги ва қолган 8 та корхона бошқа турлардаги фаолият билан шуғулланиб келмоқда.  

Шунингдек, Татаристон Республикаси, Челябинск, Ростов ва Омск вилоятлари билан ҳам яқиндан ҳамкорликни ривожлантириш, савдо-иқтисодий, ижтимоий-маданий соҳаларда алоқаларини ўрнатиш бўйича бир қатор чора-тадбирлар амалга оширилаётганини алоҳида таъкидлаш жоиз. Жумладан, 2022 йилнинг октябрь ойида Қозон Федерал университетининг илк хорижий филиали Жиззах шаҳрида очилди. Татаристоннинг “ХИМГРАД” АЖ компанияси билан Жиззах шаҳри “Жиззахпластмасса” АЖ ҳудудида технопарк ташкил этиш бўйича янги лойиҳа амалга оширилмоқда. Ушбу лойиҳанинг амалга оширилиши доирасида ҳудудда йирик пластикдан қурилиш материалларини ишлаб чиқариш саноат зонаси ишга туширилиши режалаштирилган.  

Учрашув доирасида икки томонлама савдо ва иқтисодий масалаларни янада ривожлантириш бўйича таклифлар муҳокама қилинди.  

А.ҚАЮМОВ, ЎзА