Қўқон педагогика институти талабалари халқаро даражада катта ютуқларга эришмоқда

Мамлакатимизда ногиронлиги бўлган шахсларнинг ҳуқуқларини таъминлашга ҳар томонлама шароит яратилмоқда. Инклюзив таълимни бутун мамлакат бўйлаб ривожлантиришга қаратилган ислоҳотлар бунга амалий мисол бўлади.  

Жорий ўқув йилида Қўқон давлат педагогика институтида 149 нафар имконияти чекланган талабалар таҳсил олиб келмоқда. Улардан 96 нафари бепул ётоқхона билан таъминланган. Имконияти чекланган талаба-ёшларимиз бошқа тенгдошларидан ўқиш, спорт, жамоатчилик ишларида асло кам эмаслар. Улар орасида Моҳигул Ҳамдамова Япониянинг Токио шаҳрида бўлиб ўтган XVI ёзги Паралимпия ўйинларида олтин медални қўлга киритган бўлса, Камрон Эркинбоев, Исломжон Хабибуллаевлар пара енгил атлетика бўйича Ўзбекистон очиқ чемпионатида иккита олтин, битта кумуш медални қўлга киритган.  

Бундан ташқари, Зуҳриддин Валиев яқинда Сингапурда ўтказиладиган халқаро мнемоника мусобақасига йўлланмани қўлга киритди. Қўқон давлат педагогика институти ректори Дилноза Ходжаева, соҳа проректорлари иштирокида институтда турли йўналишларда таҳсил олаётган имконияти чекланган талаба-ёшлар билан доимо очиқ мулоқот ўтказиб келади. Расмиятчиликдан холи, самимий руҳда ўтган учрашувларда имконияти чекланган талабаларнинг турли соҳалар бўйича савол, таклиф ва ташаббуслари тингланади.  

Бундай очиқ мулоқотларда талабалар томонидан ўқув адабиётлари, ўқишни кўчириш, турли грантларда иштирок этиш, чет тилини билиш сертификатларини қўлга киритиш каби аниқ таклифлар, ечимини кутаётган муаммолар ўртага ташланади. Ҳар бир масала юзасидан олийгоҳ раҳбарияти аниқ ва атрофлича жавоблар қайтарадилар, ечимини кутаётган масалaлар ҳал этилади.  

Яқинда ўтган ана шундай мулоқот даврида Пара енгил атлетика бўйича икки карра Ўзбекистон чемпиони Исломжон Хабибуллаевни институтда имконияти чекланган талабалар кенгашини тузиш тўғрисидаги таклифи қўллаб-қувватланди.  

 

ЎзА