Россия Федерациясининг Астрахань шаҳрида “Каспий медиа форуми” бўлиб ўтмоқда.

Унда ўнга яқин мамлакат журналистлари, оммавий ахборот воситалари ходимлари, медиа вакиллари иштирок этмоқда.  

Бу йил саккизинчи маротаба ўтказилаётган “Каспий медиа форуми”да мамлакатимиздан Ўзбекистон Журналистлар уюшмаси аъзолари – телерадиоканаллар, босма ҳамда интернет нашрларида фаолият юритаётган ҳамкасбларимиз қатнашмоқда.  

Айтиб ўтиш керакки, давлатимиз раҳбарининг 2022 йил 27 июнда қабул қилинган “Оммавий ахборот воситаларини қўллаб - қувватлаш ва журналистика соҳасини ривожлантириш чора - тадбирлари тўғрисида"ги қарорида ОАВ вакиллари хориж мамлакатларига малака ошириш, стажировка ўташ ва нуфузли медиа тадбирларда иштирок этиш учун юборилиши белгиланган.  

Ўзбекистон Журналистлар уюшмаси шу асосда 2023 - 2024 йилларда 60 га яқин  журналист ва таҳририят ходимларини чет давлатларга тажриба алмашиш учун жўнатиш, хорижлик малакали мутахассисларни жалб этган ҳолда ўқув курслари ташкил этишни режалаштирган.

 

М.Қосимова, ЎзА