Institutda o‘quvchi-yoshlarni oliy o‘quv yurtiga tayyorlash borasida ibratli ishlar olib borilmoqda
Andijon mashinasozlik institutida o‘quvchi-yoshlarni oliy o‘quv yurtlariga tayyorlash borasida olib borilayotgan ishlar samaradorligini yanada oshirish masalasiga bag‘ishlangan davra suhbati bo‘lib o‘tdi.
Andijon mashinasozlik institutida o‘quvchi-yoshlarni oliy o‘quv yurtlariga tayyorlash borasida olib borilayotgan ishlar samaradorligini yanada oshirish masalasiga bag‘ishlangan davra suhbati bo‘lib o‘tdi.Prezidentimizning 2017-yil 26-sentabrdagi “Oliy ta’lim muassasalariga kirish uchun nomzodlarni maqsadli tayyorlash tizimini yanada takomillashtirish to‘g‘risida”gi qarori ijrosi doirasida o‘tkazilgan tadbirda professor-o‘qituvchilar, institut qoshidagi akademik litsey o‘quvchilari, ularning ota-onalari ishtirok etdi.
Mamlakatimizda yoshlarning zamonaviy bilim va kasb-hunarlarni puxta egallashi uchun sharoit yaratish, o‘rta maxsus, kasb-hunar ta’limi muassasalari bitiruvchilarini ta’limning keyingi bosqichiga jalb etish borasida izchil ishlar olib borilayotgani ta’kidlandi.
– Institutimizda 12 ixtisoslik yo‘nalishi bo‘yicha 4 mingdan ziyod talaba, institut qoshidagi akademik litseyda 600 dan ziyod o‘quvchi tahsil olmoqda, – deydi Andijon mashinasozlik institutining akademik litsey va kasb-hunar kollejlari bo‘yicha prorektori Akmaljon Ermatov. – Ularga muayyan mutaxassislik bo‘yicha puxta bilim berish, akademik litsey o‘quvchilarini ta’limning keyingi bosqichiga tayyorlashga qaratilgan ishlar tizimli ravishda olib borilmoqda.
Tadbirda Prezidentimizning yuqorida zikr etilgan qarori mazmun-mohiyati, akademik litsey o‘quvchilarini oliy ta’lim muassasalariga tayyorlashning muhim yo‘nalishlari va tashkiliy normativ asoslari xususida ishtirokchilarga ma’lumot berildi. Bu borada olib borilayotgan ishlar, ularning samaradorligini oshirish yuzasidan fikr almashildi.
– Bugun institutda farzandlarimizni oliy o‘quv yurtiga tayyorlash borasida ibratli ishlar olib borilayotganiga guvoh bo‘ldik, – deydi tadbir ishtirokchisi Tolibjon Toshtemirov. – Yosh avlod taqdiri, ularning har jihatdan yetuk va barkamol voyaga yetishi uchun ko‘rsatilayotgan bunday e’tibordan mamnunmiz.
Ishtirokchilar o‘zlarini qiziqtirgan barcha savollarga mutaxassislardan batafsil javob oldi.