Размер шрифта: A A A
Цвет сайта: A A A A

21.11.2017 16:47 Chop etish versiyasi

Toshkentda “Sement sanoati va bozori” XV xalqaro konferensiyasi bo‘lib o‘tmoqda

Toshkentda “Sement sanoati va bozori” XV xalqaro konferensiyasi bo‘lib o‘tmoqda “O‘zqurilishmateriallari” aksiyadorlik jamiyati va Rossiya Federatsiyasining “Biznes Sem” kompaniyasi hamkorligida tashkil etilgan forumda O‘zbekiston, Rossiya, Xitoy, Turkiya, Buyuk Britaniya, Germaniya, Italiya, Ispaniya, Daniya, Avstriya, Avstraliya, Armaniston, Hindiston, Qozog‘iston, Ukraina kabi davlatlardan yetakchi kompaniya va firmalar vakillari, mutaxassislar ishtirok etmoqda.

“O‘zqurilishmateriallari” aksiyadorlik jamiyati boshqaruvi raisi o‘rinbosari T.Muhammadjonov va boshqalar mamlakatimizda ulkan bunyodkorlik ishlari amalga oshirilayotgani, yuqori sifatli qurilish materiallariga talab ortib borayotganini ta’kidladi. Prezidentimiz Shavkat Mirziyoyevning 2016-yil 26-dekabrdagi “2017-2019 yillarda tayyor mahsulot turlari, butlovchi buyumlar va materiallar ishlab chiqarishni mahalliylashtirishning istiqbolli loyihalarini amalga oshirishni davom ettirish chora-tadbirlari to‘g‘risida”gi qarori ushbu soha rivojida muhim ahamiyat kasb etmoqda.

2.JPG

Bugungi kunda yurtimizda deyarli barcha turdagi qurilish materiallari ishlab chiqarilayotir. Energiya tejamkor va samarador texnologiyalarni joriy qilish orqali import o‘rnini bosadigan va eksportga mo‘ljallangan mahsulotlar turini kengaytirishga alohida e’tibor qaratilmoqda. Xususan, sement sanoati ham izchil modernizatsiya qilinmoqda. Ayni paytda mamlakatimizda 14 sement zavodi faoliyat yuritmoqda. 2010-2016-yillarda ularda ishlab chiqarish hajmi 1,25 barobar oshib, yiliga 9 million tonnaga yetgan. Kelgusida 10 million tonna sement tayyorlashni yo‘lga qo‘yish rejalashtirilgan.

“Qizilqumsement” aksiyadorlik jamiyati yurtimizdagi yetakchi korxonalardan biri. Bu yerda yiliga qariyb 3,5 million tonna sement tayyorlanadi. Shuningdek, “Ohangaronsement”, “Quvasoysement” va “Bekobodsement” aksiyadorlik jamiyatlarida 4 million tonnaga yaqin mahsulot ishlab chiqarilayotir. Har yili yangi ishlab chiqarish quvvatlari barpo etilmoqda. Joriy yilda Qoraqalpog‘istonda “Qoraqalpoqsement”, Farg‘onada “Yaypanshifer” mas’uliyati cheklangan jamiyatlari foydalanishga topshirilgani fikrimiz dalilidir.

– Biz O‘zbekiston bilan sement ishlab chiqarish sohasida uzoq yillardan buyon hamkorlik qilib kelamiz, – deydi “DAL Teknik Makina” kompaniyasining mintaqaviy muvofiqlashtiruvchisi o‘rinbosari Lina Dyurak (Turkiya). – Hamkorligimiz doirasida Jizzax sement zavodi qurib foydalanishga topshirilgan edi. Hozirgi kunda Surxondaryoda yillik quvvati 1,5 million tonna bo‘lgan yana bir sement zavodi qurilayotir. O‘zbekistonda yaratilgan qulay investitsiya muhitidan unumli foydalanib, Olmaliqda metall ishlab chiqarish zavodi qurilishiga sarmoya kiritganmiz.

Konferensiyada O‘zbekiston sement sanoatining texnologik liniyalarini modernizatsiya qilish, yangi sement zavodlari qurishda energiya tejamkor uskunalardan foydalanish, sement tayyorlash jarayonida is gazi ajralib chiqishini kamaytirish mavzularida ma’ruzalar tinglandi. 2018 yilda qurib bitkazilishi rejalashtirilgan 4 ta sement zavodini barpo etish bo‘yicha amalga oshirilayotgan chora-tadbirlar haqida ma’lumot berildi. Sohaga ekologik toza texnologiyalarni joriy qilish va qo‘shma korxonalar tashkil etish masalalari muhokama qilindi.

6.JPG

– Yangi konlarni o‘zlashtirish va mavjudlaridan samarali foydalanish ishlab chiqarish barqarorligini ta’minlashda muhim ahamiyatga ega, – deydi “Thyssenkrupp Industrial Solutions” kompaniyasi menejeri Valdemar Klassen (Germaniya). – O‘zbekistonda bu borada izchil ishlar olib borilmoqda. Kompaniyamiz tog‘-kon sanoatida ishlatiladigan zamonaviy texnika va uskunalar ishlab chiqaradi. An’anaviy tarzda o‘tkazib kelinayotgan mazkur konferensiya ishlab chiqaruvchi va xaridorlar o‘rtasida manfaatli hamkorlikni kengaytirish, sohadagi yutuq va kamchiliklarni tahlil qilish imkonini beradi.

Tadbirda dunyoga mashhur “AUMUND”, “GeoCon GmbH”, “Refrotenik Cement GmbH”, “Haver&Boecker”, “Thyssenkrupp Industrial Solutions”, “FLSmidth A/S”, “Fundiciones Del Estanda”, “Dal Teknik Makina” kabi bir qancha yirik kompaniyalarning sement sanoati uskunalari ko‘rgazmasi tashkil etildi.

Konferensiya doirasida xorijlik mutaxassislar “O‘zqurilishmateriallari” aksiyadorlik jamiyati tarkibidagi ishlab chiqarish korxonalari faoliyati bilan tanishadi.

Poytaxtimizda yettinchi bor o‘tkazilayotgan mazkur konferensiya mamlakatimiz sement sanoatini har tomonlama rivojlantirish, sohaga investitsiya jalb etish orqali mavjud ishlab chiqarish hajmi va sifatini oshirish, tarmoqni rekonstruksiya va modernizatsiya qilishdagi hamkorlik istiqbollarini belgilab olishda muhim o‘rin tutadi.

Ulug‘bek Shonazarov, Oqil G‘ulomov (surat), O‘zA
1 476






Все о погоде - Pogoda.uz