Tegishli dasturga asosan 31 ming 791 tonna oziq-ovqat mahsulotlari tayyorlash rejalashtirilgan
Mamlakatimizda aholining qishloq xo‘jaligi mahsulotlariga bo‘lgan talabini qondirish, qish va bahor oylarida ham dasturxon to‘kinligini ta’minlash, bozorda narx-navo barqarorligiga erishish maqsadida oziq-ovqat mahsulotlarini zaxiraga g‘amlash ishlari qizg‘in davom etmoqda.
Mamlakatimizda aholining qishloq xo‘jaligi mahsulotlariga bo‘lgan talabini qondirish, qish va bahor oylarida ham dasturxon to‘kinligini ta’minlash, bozorda narx-navo barqarorligiga erishish maqsadida oziq-ovqat mahsulotlarini zaxiraga g‘amlash ishlari qizg‘in davom etmoqda.Aholi va ijtimoiy soha muassasalarining ehtiyojlari uchun qish-bahor faslida qishloq xo‘jaligi mahsulotlarining asosiy turlarini g‘amlash ishlari uyushqoqlik bilan olib borilmoqda. Tayyorlov tashkilotlarining ijtimoiy ahamiyatga ega oziq-ovqat mahsulotlari ishlab chiqaruvchilar bilan tuzilgan shartnomalar ijrosini ta’minlash, omborxona va sovutgichlardan unumli foydalanish, qish-bahor oylarida ichki bozorga mahsulotni muntazam, bir maromda yetkazib berish hisobiga narx-navo barqarorligini saqlab turishga alohida e’tibor qaratilmoqda.
Prezidentimizning 2017-yil 20-oktabrdagi “2017-2018-yillar qish-bahor faslida Respublika aholisini va ijtimoiy soha muassasalarini qishloq xo‘jaligi mahsulotlarining asosiy turlari bilan kafolatli ta’minlash chora-tadbirlari to‘g‘risida”gi qarori bu borada muhim dasturilamal bo‘layotir.
Qoraqalpog‘iston Respublikasi Qishloq va suv xo‘jaligi vazirligidan olingan ma’lumotlarga ko‘ra, 2017-2018-yillar qish-bahor faslida ichki iste’mol bozori uchun qishloq xo‘jaligi mahsulotlarining asosiy turlarini g‘amlash bo‘yicha ishlab chiqilgan dasturga asosan 31 ming 791 tonna oziq-ovqat mahsulotlari tayyorlash rejalashtirilgan.
– Jumladan, mahalliy hokimliklar hisobidan jami 20 ming 367 tonna – 4 ming 28 tonna kartoshka, 4 ming 294 tonna piyoz, 3 ming 220 tonna sabzi, 8 ming 825 tonna guruch g‘amlash belgilangan, – deydi Qoraqalpog‘iston Respublikasi Qishloq va suv xo‘jaligi vazirligi bo‘lim boshlig‘i Muratboy Qurboniyozov. – Ijtimoiy tarmoqlar, xususan, Xalq ta’limi vazirligi tizimidagi muassasalarda 517 tonna, sog‘liqni saqlash tashkilotlarida 257 tonna qishloq xo‘jaligi mahsulotlarini qish-bahor oylari uchun zaxiraga jamg‘arish nazarda tutilgan.
Aholi dasturxoniga tortiq etiladigan qishloq xo‘jaligi mahsulotlarining 15 ming 270 tonnasi zamonaviy sovutgichlarda, 15 ming 525 tonnasi fermer xo‘jaliklari omborxonalarida saqlanadi.