Размер шрифта: A A A
Цвет сайта: A A A A

28.12.2017 19:41 Чоп этиш версияси

“Mirzo Ulugbek Innovation Center” инновация маркази резидентларига яна бир имтиёз тақдим этилди

2018 йил январь ойидан бошлаб Ахборот технологияларини ишлаб чиқиш ва жорий қилишни қўллаб-қувватлаш бўйича “Mirzo Ulugbek Innovation Center” инновация маркази резидентлари “Резидент” имтиёзли тарифи остида фаолият кўрсатувчи “қулай” банк хизматидан фойдаланиши мумкин.

У “Алоқабанк” акциядорлик тижорат банки мутахассислари билан ҳамкорликда ишлаб чиқилган бўлиб, резидентларга қатор енгиллик ва имтиёзлар тақдим этади. Энг муҳими, энди улар банк операциялари билан боғлиқ маъмурий сарсонгарчиликдан бутунлай озод бўлади.

Янги банк хизмати 2018 йилнинг юртимизда Фаол тадбиркорлик, инновацион ғоялар ва технологияларни қўллаб-қувватлаш йили, деб эълон қилиниши муносабати билан ишлаб чиқилди. Резидентлар хоҳишига кўра, Ахборот технологияларини ишлаб чиқиш ва жорий қилишни қўллаб-қувватлаш бўйича “Mirzo Ulugbek Innovation Center” инновация маркази ишончли вакил сифатида валюта ҳисобини очишдан тортиб, экспорт-импорт операцияларини амалга оширишга кўмаклашишгача бўлган банк хизматларидан фойдаланиш билан боғлиқ масалаларда уларнинг манфаатини ҳимоя қилади.

Шунингдек, марказ ходимлари “Алоқабанк” АТБ мутахассислари билан ҳамкорликда ахборот технологиялари соҳасидаги стартап-лойиҳаларни амалга ошириш учун молиялаштириш механизмларини белгилаш ва инвестицияларни жалб этиш бўйича консультациялар ўтказади.

Бундан кўзланган асосий мақсад, резидентларни бюрократик тўсиқларни мустақил равишда енгиб ўтиш заруриятидан озод этган ҳолда, уларнинг ишини енгиллаштириш ҳамда ахборот технологиялари компанияларининг фақат ўз фаолиятига ихтисослашувига замин яратишдан иборат. Шунингдек, банк соҳасини атрофлича ўрганиш инновация маркази вакилларига экспорт-импорт операцияларини амалга оширишда резидентлар дуч келадиган қийинчиликларни аниқлаш, уларга ечим топиш ва келгусида қонунчиликни такомиллаштириш бўйича таклифлар киритишга хизмат қилади.

Инновация маркази резидентларига рақобатбардош лойиҳаларини амалга ошириш учун хорижий инвестицияларни жалб этишга кўмаклашилади. 2018 йил 24-25 январь кунлари Ҳиндистоннинг Бангалор шаҳрида дастурий таъминот бўйича бўлиб ўтадиган “INDIASOFT – 2018” кўргазмасига ташриф доирасида резидентларга етакчи ҳинд компаниялари билан ҳамкорликни йўлга қўйиш имкониятини тақдим қилиш бу борадаги самарали тадбирлардан бири бўлади.

Роман Бондарчук, ЎзА
4 048