ЎзА Ўзбек

28.02.2019 Чоп этиш версияси

Ниғматилла Йўлдошев: “Айрим дарсликлар марҳумлар номидан чоп этилмоқда”

Ниғматилла Йўлдошев: “Айрим дарсликлар марҳумлар номидан чоп этилмоқда”

Ўзбекистон Республикаси Олий Мажлиси Сенатининг ўн саккизинчи ялпи мажлисида маъруза қилган Сенат раиси Н.Йўлдошев мактаб таълими тизимидаги камчиликларга тўхталиб ўтди. 

Таҳлиллар мактабларнинг моддий-техник базаси, соҳа ходимлари учун шарт-шароитлар кундан-кунга яхшиланиб бораётган бир шароитда таълим сифати ва натижадорлик кутилганидек эмаслигини кўрсатган.

“Бунинг асосий сабабларидан бири – мактаб дарсликларини таълим стандартлари ва дастурлар асосида тайёрлаш, чоп этиш ва тарқатишда йўл қўйилаётган жиддий камчиликлар, хатолар ва бошқа мавҳумликларда, деб биламиз”, деб қайд этди Н.Йўлдошев.

Сўнгги уч йилда Давлат бюджети ва мақсадли китоб жамғармасининг қарийб 307 миллиард сўм маблағи эвазига 98 миллион нусхадан ортиқ дарсликлар чоп этилган.

Аммо уларни яратишга оид мукаммал ҳуқуқий асослар шу пайтга қадар тўлиқ шаклланмаган. Оқибатда илк босқичдаёқ дарсликлар ўқув дастурларига мувофиқ тайёрланмаган.

Маърузачи таъкидлаганидек, “Вафот этган муаллифларнинг дарсликларини қайта нашр қилиш тартиби ҳам аниқ белгиланмаган. Оқибатда дарсликлар қатор ўзгартиришлар билан марҳумлар номидан чоп этилмоқда”.

Масалан, 7-синф “Ўзбекистон тарихи” дарслигининг муаллифи А.Муҳаммаджонов 2016 йилда вафот этган. Бироқ, унинг дарслигидаги барча мавзулар қайта ишланган, 6 мавзу янгидан ёзилган ва дарслик 2017 йилда марҳум муаллиф номидан қайта нашр этилган.

Дарсликларнинг тендер савдолари орқали ғолиб бўлган турли нашриётларда нашр этилиши ўқув материалининг узвийлиги, уйғунлиги ва изчиллигини, шунингдек, предметлар аро алоқанинг боғлиқлигини таъминлашга тўсиқ бўлмоқда.

Дарсликларда бир-бирини рад этадиган хулосалар, мавҳумликлар ва номувофиқликлар кўпайиб кетганлиги ўқитувчи ва ўқувчиларни чалғитмоқда.

Аксарият ҳолларда, дарсликлар назариётчи олимлар томонидан амалиётдан йироқ ҳолда яратилмоқда. Ушбу жараёнга тажрибали мактаб ўқитувчилари етарли даражада жалб этилмаяпти.

Бу каби жиддий хато ва камчиликларни бартараф этиш таълим сифатини оширишда муҳим ўрин тутади.

3 310
Н.Абдураимова, ЎзА