Размер шрифта: A A A
Цвет сайта: A A A A

12.07.2018 10:48 Чоп этиш версияси

Дори воситаларининг ноқонуний олиб кирилиши олди олинди

Дори воситаларининг ноқонуний олиб кирилиши олди олинди
Тошкент шаҳар божхона бошқармасининг “Бош почтампт” ташқи иқтисодий фаолият божхона постида Россия федерациясидан жўнатилган почта жўнатмаси орқали Тошкент шаҳрида истиқомат қилувчи бир нечта фуқаролар номига юборилган аммо декларацияда кўрсатилмаган дори воситалари ва тиббиёт буюмларини ноқонуний олиб кириш ҳолати аниқланди.

Жўнатмаларни божхона кўригидан ўтказиш давомида “CN-23” шаклидаги божхона декларациясида кўрсатилмаган 965 конвалютада ва 751 қутида ҳамда 113 флаконда ҳар хил дорилар борлиги маълум бўлди. Дастлабки маълумотларга кўра, мазкур дори-дармонларнинг қиймати салкам 277 миллион сўмни ташкил қилади.

Шунингдек, Тошкент шаҳар божхона бошқармасининг “Келес” темир йўл чегара божхона пости ходимлари “Алмата – Тошкент” йўловчи поезди йўловчиларининг қўл юкларини божхона назоратидан ўтказиш пайтида қўшни давлат фуқароси йўловчи божхона декларациясида кўрсатилмаган ҳамда божхона ходимининг оғзаки сўровида маълум қилмаган қиймати 27,5 миллион сўмдан ортиқ 218 дона турли хил витаминларни олиб киришга урингани аниқланди.

Худди шу поезддаги бошқа бир йўловчи, қўшни давлат фуқароси қиймати 16 миллион сўмлик 1 минг 80 дона дори-дармонларни яширинча олиб киришга урингани фош этилди.

Ҳозирда мазкур ҳолатлар юзасидан божхона текширувлари ва суриштирув ҳаракатлари давом эттирилмоқда.

Шу ўринда айтиш жоиз, сифатсиз дори-дармон ва фармацевтика маҳсулотлари инсон учун энг азиз неъмат – сиҳат-саломатликка жиддий хавф туғдириши шубҳасиз. Чунки, ҳар хил шароитларда ва белгиланган меъёрларга риоя қилинмаган ҳолда ташиладиган, олиб келинадиган дорилар шифо ўрнига касалликни янада кучайтириб юбориши мумкин.

ЎзА
1 928