ЎзА Ўзбек

07.11.2019 Чоп этиш версияси

Агрокластер маҳсулотлари хорижга экспорт қилинади

Агрокластер маҳсулотлари хорижга экспорт қилинади

Қишлоқ хўжалигида таркибий ислоҳотларни янада чуқурлаштириш, тўғридан-тўғри инвестицияларни жалб қилиш ва буни рағбатлантириш бугунги асосий вазифалардан бири этиб белгилаб қўйилган.

Қолаверса, пахта хом ашёси етиштиришнинг самарали усулларини жорий этиш, уруғлик хом ашё ишлаб чиқариш, уни қайта ишлаш ва тайёрлаш, шунингдек, бошқа турдаги қишлоқ хўжалиги маҳсулотларини чуқур қайта ишлаш асосида уларни ишлаб чиқаришни ташкил этиш масалаларига ҳам алоҳида эътибор қаратиб келинмоқда.

Бу борада Президентимизнинг 2018 йил 9 ноябрдаги “Жиззах вилоятида замонавий агрокластер ташкил этиш чора-тадбирлари тўғрисида”ги қарори қабул қилинди. Шунга асосан, 2018 йилнинг 8 май куни Ўзбекистон Республикаси ва АҚШ компаниялари иштирокида “Silverleafe Agriculture” савдо белгиси номи остида замонавий қўшма корхона ташкил этилди ҳамда тўғридан-тўғри хорижий инвестициялар ҳисобига агрокластер ташкил этиш учун 2000 гектар ер майдони ажратиб берилди.

Жиззах Агрокластер 1.jpg

Жиззах вилояти божхона бошқармаси ходимлари мазкур агрокластер фаолияти билан танишиш, у ерда божхона соҳасига доир турли муаммолар юзага келишининг олдини олиш ва келгусида ўзаро ҳамкорликдаги вазифаларни белгилаб олиш мақсадида корхонага ташриф буюрди.

Ташриф давомида салкам 44 миллиард сўмлик божхона имтиёзлари асосида корхонага олиб келинган замонавий ускуналарнинг ишлаш жараёни ҳам кўздан кечирилди. Бугунги кунда корхонада замонавий қишлоқ хўжалик техникалари, жумладан, АҚШ, Германия, Франция, Канада ҳамда Бразилияда ишлаб чиқарилган 22 тадан ортиқ “JOHN DEERE” ва“JCB” русумидаги кўп функцияли тракторлари, пахта териш машиналари ҳамда 28 та ерга ишлов берувчи агрегатлари (ёрдамчи мосламалари), эҳтиёт қисмлари келтирилган ва ҳозирда улардан самарали фойдаланиб келинмоқда.

Кейинги манзил “Пахтакор пахта тозалаш” заводи бўлди. Бу ерда замонавий қишлоқ хўжалиги техникалари ёрдамида териб олинган пахта хом ашёси автоматик қурилмалар ёрдамида тоза ва қайта ишлаб чиқаришга тайёр маҳсулот кўринишига келтирилади.

Маълумот тарзида айтиш жоиз, Ўзбекистон Республикаси Вазирлар Маҳкамасининг тегишли қарорига асосан, “Silverleafe Agriculture” савдо белгиси номи остидаги қўшма корхонага Жиззах вилоятининг Пахтакор туманидан катта миқдорда ер майдони ажратилиши белгиланди.

Жиззах Агрокластер 3.jpg

Бугунги кунда, ушбу пахта тозалаш заводини модернизация қилиш мақсадида 5 миллиард сўм миқдоридаги таъмирлаш ишлари амалга оширилди ҳамда хориждан 380 минг АҚШ доллари миқдорига тенг бўлган ишлаб чиқариш линиялари, ускуналар ва эҳтиёт қисмлари божхона имтиёзлари асосида олиб келинди.

Келгусида қўшма корхона томонидан Пахтакор туманида замонавий “Пульсар” суғориш тизимини жорий этиш орқали пахта ҳосилдорлигини ошириш режалаштирилмоқда. Бу усулда суғориш лойиҳасига эса 100 миллион АҚШ доллари миқдоридаги қўшимча инвестиция маблағлари жалб этилади.

Шунингдек, кластер лойиҳаси доирасида тайёр маҳсулотлар “Питер Миллар”, “Костко” ҳамда “Таргет” номли компанияларининг буюртмасига асосан АҚШ ва Европа бозорларига экспорт қилинади.

554
ЎзА