Размер шрифта: A A A
Цвет сайта: A A A A

05.05.2017 17:01 Чоп этиш версияси

Олий таълим сифати ва самарадорлигини оширишда янги босқич бошланди

Президентимиз Шавкат Мирзиёевнинг 2017 йил 20 апрелдаги “Олий таълим тизимини янада ривожлантириш чора-тадбирлари тўғрисида”ги қарори соҳа фаолиятини такомиллаштириш, малакали кадрлар тайёрлашнинг маъно-мазмунини тубдан қайта кўриб чиқиш, халқаро стандартлар даражасида малакали мутахассислар тайёрлаш тизимини янги босқичга кўтаришда муҳим аҳамият касб этади.

Ушбу ҳужжат бизнинг институтимизда ҳам таълим сифати ва самарадорлигини янада оширишга хизмат қилади. Жумладан, қарорга кўра, 2017-2021 йилларда институт қабул квотаси амалдагига нисбатан 23,9 фоиз кўпайиши кутилмоқда. Шунингдек, янгидан 3 бакалавриат йўналиши ва 7 магистратура мутахассислиги очилади.

Институтимиз айни пайтда АҚШ, Германия, Италия, Испания, Польша, Португалия, Греция, Чехия, Россия, Эстония, Латвия, Жанубий Корея, Япония, Хитой ва бошқа давлатларнинг 60 дан ортиқ етакчи турдош илмий-таълим муассасалари билан ҳамкорлик алоқаларини йўлга қўйган. Ушбу ҳамкорлик доирасида ўқитувчиларимиз хорижда малака ошириб келмоқда. Чет эллик мутахассислар келиб, талабаларимиз ва ёш илмий ходимларга ўз тажрибаларини ўргатмоқда. Қарорда белгиланган чора-тадбирлар ва педагогларга бериладиган имтиёзлар туфайли эндиликда бу борадаги ишлар кўлами янада кенгаяди.

Педагог кадрларни рағбатлантириш мақсадида ректор жамғармаси тузилади ва ундан педагогнинг ўқув жараёнига қўшган ҳиссаси ва касб маҳорати, юқори таълим сифати, тарбия жараёнидаги самарали иштирокига қараб ойлик маошига устама ҳақ тўлаш йўлга қўйилади. Педагогнинг ўқув жараёнига қўшган аниқ ҳиссаси, маҳорати, таълим сифатини аниқлаш учун илғор хорижий тажрибадан фойдаланган ҳолда ички аттестация тизими ишлаб чиқилади.

Мазкур қарор ижроси доирасида институтда 2018 йилда 720 ўринли зоотехника факультети учун янги бино қурилади. Кейинги йилларда яна 3 ўқув биноси бунёд этилади, 2 талабалар турар жойи капитал таъмирланади, 14 ўқув ва 2 илмий лаборатория базаси замонавий асбоб-ускуналар билан жиҳозланади. Институтнинг барча ҳудудини қамраб оладиган ва юқори тезликда ишлайдиган симсиз Wi-Fi қурилмалари ишга туширилади.

Самарқанд ва қўшни вилоятлар қишлоқ хўжалиги хусусиятларидан келиб чиққан ҳолда институтнинг ихтисослик йўналишлари ва мутахассисликлари оптималлаштирилади. Ҳудудларнинг ижтимоий-иқтисодий ривожланиши ва табиий-иқлим шароити ҳисобга олинган ҳолда Сирдарё вилоятида анорчилик, Қашқадарёда йилқичилик, балиқчилик ва паррандачилик, Навоий ва Бухоро вилоятларида қоракўлчилик, Самарқандда иссиқхона боғдорчилиги ва сабзавотчилиги, тропик ва доривор ўсимликлар етиштириш йўналишлари бўйича ишлаб чиқариш, қайта ишлаш технологияси, эчкичилик каби истиқболли тармоқларни ривожлантиришга қаратилган ўқув дастурлари ва фанлари киритилади.

Айни кунларда институтимизда қарор ижросини таъминлаш борасидаги ишлар жадал амалга оширилмоқда. Ўтган вақт давомида янги авлод ўқув қўлланмаларини яратиш ва олий таълим тизимига кенг татбиқ этиш бўйича бир қатор ишлар бажарилди. Хорижий грантлар асосида энг янги илмий адабиётлар сотиб олинди ва таржима қилиш бошланди.

Тоштемир Остонақулов,
Самарқанд қишлоқ хўжалик институти ректори.

ЎзА
6 675






Все о погоде - Pogoda.uz