Размер шрифта: A A A
Цвет сайта: A A A A

03.05.2017 22:06 Чоп этиш версияси

2 мингдан зиёд турдаги маҳсулотлар намойиш этилди

2 мингдан зиёд турдаги маҳсулотлар намойиш этилди Наманган вилоятида 15 минг 500 дан зиёд кичик бизнес субъекти фаолият кўрсатиб, уларнинг ялпи ҳудудий маҳсулотдаги улуши 68,2 фоизни ташкил этмоқда.

Ўзбекистон Республикаси Президенти соврини учун “Ташаббус – 2017” кўрик-танловининг Наманган вилояти босқичида бу алоҳида таъкидланди.

– Танловнинг шаҳар ва туман босқичларида 350 дан ортиқ тадбиркор, фермер ва ҳунарманд иштирок этиб, улар орасидан сараланган 35 иштирокчи вилоят босқичида ўз имкониятини синовдан ўтказмоқда, – дейди Наманган вилояти ҳокимининг биринчи ўринбосари А.Ортиқов. – Иштирокчиларнинг кўргазмаларини кузатар экансан, бир вақтлар чет эллардан келтирилган лок-бўёқ, трикотаж, кийим-бош, пойабзал ва бошқа кўплаб маҳсулотлар энди ўзимизда нафақат ишлаб чиқарилаётгани, балки экспорт қилинаётганидан беихтиёр ғурурланиб кетасан киши. Бу мамлакатимизда амалга оширилаётган изчил иқтисодий ислоҳотлар самарасидир.

Наманган шаҳридаги муҳташам "Ёшлар маркази”да тадбиркор, фермер ва ҳунармандлар ўзлари ишлаб чиқараётган 2 мингдан зиёд турдаги саноат ва қишлоқ хўжалиги маҳсулотлари, ҳунармандлик буюмлари, халқ истеъмоли молларини намойиш этди. Жумладан, кўргазмада миллий ҳунармандликнинг қўл меҳнатига асосланган анъанавий турлари – тўқимачилик, зардўзлик, каштачилик маҳсулотларига ҳам қизиқиш катта бўлди.

Наманган туманидаги “Element paint” масъулияти чекланган жамияти раҳбари Акмалжон Аҳмаджонов “Энг яхши тадбиркор”, “Мусаффао иқлим транс” фермер хўжалиги раҳбари Комилжон Юсупов “Энг яхши фермер”, Наманган шаҳридан тўқувчи Обидхон Жамолов “Энг яхши ҳунарманд” номинациялари бўйича ғолиб бўлди ва танловнинг мамлакат босқичида қатнашиш ҳуқуқини қўлга киритди.

– “Ташаббус” да аввал ҳам қатнашганман ва бу танлов мен учун катта мактаб вазифасини ўтаган, – дейди Акмалжон Аҳмаджонов. – Корхонамизда уй-жой қурилиши учун лок-бўёқ маҳсулотлари ишлаб чиқарилади. Ўтган йилларда корхонани модернизация қилиш, маҳсулот сифатини яхшилашга алоҳида эътибор қаратдик. Бугун юртимизда кенг қулоч ёйган бунёдкорлик ишларини қурилиш-пардозлаш ашёларисиз тасаввур этиб бўлмайди. Келажакда маҳсулот турини кенгайтириш ва сифатини янада юксалтириш мақсадида янги лойиҳаларни амалга оширишни режалаштирганмиз.

Танловда шунингдек, 10 дан ортиқ йўналишлар бўйича энг яхши деб топилган тадбиркор, фермер ва ҳунармандлар аниқланиб, тақдирланди.

Акрамжон Сатторов, Ҳотам Мамадалиев (сурат), ЎзА
4 764






Все о погоде - Pogoda.uz